Михайлд өөрийн бодол бий гэж манайхан ярих дуртай. Аливаад өөрийн бодолтой гэдгийг ингэж хэлэх болсон. Хүн өөрийнхөөрөө байх нь чухал. Энэ бол маш чухал чанар. Галуу дуурайж хэрээ хөлөө хөлдөөнө гэж Монголчууд дуураймтгай хүнийг зүйрлэдэг. Үнэндээ хорвоод мэндэлсэн хүн бүр өөрийн гэсэн тодорхой томилолттой байдаг гэдэгт итгэдэг. Олимпийн аварга Н.Түвшинбаярын томилгоо нь Монголын нэрийг дэлхийд дуурсгах алдарт бөх гэж харж байна. Харин яав ч УИХ-ын гишүүн биш гэж итгэхийг хүснэ. Түүнийг басаж, доош нь хийх хүсэл зорилго алга. Өөрийн толгойгүй, үзэл бодолгүй, бусдын үгээр үг хийгчид олшрох нь нийгэмд хортой гэдгийг нотлох шаардлагагүй. Улс төр гэдэг хүүхэд нохойн тоглоом болжээ гэж хэлэхэд ч ойртжээ гэж сануулахад илүүдэхгүй. Ард иргэдийн амьдрал доройтох тусам, өрх гэрийн орлого багасах тусам сонгох сонголт нь ядуурдаг гэдэг судалгаа бий. Нийтээрээ ядуурах үед ийм нэгэн алдартай тамирчид, дуучдыг сонгох тал хавтгайрдаг ч гэж өрнөдийн хэвлэлд дүгнэсэн байдаг. Тэгэхээр Н.Түвшинбаяр сонгогдож болох нь, гагцхүү түүнийг хэн яах гэж сонгож байна вэ? гэдэгт л асуудал байна. Хэрвээ ийм хүмүүсийг төрийн жолоо атгуулахаар сонгоод эхэлбэл, ард иргэд цөхрөнгөө барж, амьдрал ядуурч, эрүүл саруул сэтгэхээ больж эхэлж байна аа л гэж нөгөө талаас нь харж болно. Тиймээс тиймэрхүү одонцоруудыг дэвшүүлж буй улс төрийн нам нь ч гэж "нам" болжээ л гэж ойлгогдоно. Юу дутлаа, юу хийх гэж Н.Түвшинбаяр улс төр лүү зүтгэнэ вэ? Хэн нэгнийг хаах зорилгоор шавар болж орж ирэв үү ? ч гэж асуух хүн мундахгүй. Зүгээр л, жолооч нь жолооч оо, жолоодогч нь жолоодогч оо хийцгээе, ах дүү нар аа!
ТОЙМЧ Д.ГАНТУЛГА