Ажиглавал, Л.Оюун-Эрдэнэ ерөнхий сайд Монгол улсын ардын баатар болсон юм шиг байна. Засаг, төр, эрх баригч намын байр суурийг баримтлагч , дэмжигч хэвлэлд түүнийг ингэж дөвийлгөж бичих нь үргэлжилсээр... Ерөнхий сайдынхаа энэ "баатарлаг гавьяа"-наас нь УИХ-ын дарга нь бас хуваалцах бололтой. "Энхрий хайрт" дарга нар маань ингэхэд ямархуу баатарлаг гавьяа байгуулчихсан юм бол оо? Та эргэцүүлж үзэв үү?? " Өр дарлаа л "гэнэ. Оюун-Эрдэнийн гавьяа үүнээс эхэлж буй бололтой юм. Оюу-толгойгоо, Монгол улсынхаа газар дорхи хамаг л эрдэнэс баялгаа Рио Тинтод найр тавьсан. Монголчууд энэ баялгаасаа л хүртэх ёстой. Гэтэл Рио Тинто хий хоосон өр үүсгэсэн. Тиймээс өрийн тухай яриа үүсэх үндэсгүй. Ийм өр үүссэн туршлага Монголоос өөр аль улсад ч олдохгүй. Тэгэхээр хоосон өрийг тэглэж дарна ч гэдэг бол нэг ёсны үлгэр юм. "Дубайн гэрээг цуцаллаа л гэнэ" Цуцлах ёстой шүү дээ. Монголчуудад оногдох хувийг хойшлуулсан хууль бус хуйвалдаан. Үүнийг шүүх ёстой. Хөрөнгө оруулалтыг Рио-Тинто дангаараа гаргах боллоо л гэнэ. Монголын баялгаас хэн халбагадаж, хэн баяжиж байгааг бод. Тэд л дангаараа хөрөнгө оруулах ёстой. Муу хэлэгддэг Казахстанд тийм л гэрээтэй юм билээ. Далд уурхайг ашиглалтанд оруулах ажлыг эхлүүллээ гэнэ. Харин ч оройтлоо. Ингээд бодохоор бид юунд баярлаж, хөөрцөглөнө вэ? Ерөнхий сайдын баатарлаг гавьяа гэхээр зүйл энд байна уу? Харин ч эмгэнэлтэй. Монгол улс зэсийн гол тоглогч болно гэж Оюун-Эрдэнэ сайрхаж амжив. Үнэндээ Монгол улс биш, Монголын баялгийг эзэмшигч Рио Тинто дэлхийн зах зээлийн гол тоглогч нь болж буй. Үүнийг нь Монголын төр, засаг баталгаажуулж өгсөн үйл явдал л өрнөлөө. Монголын Оюу-Толгой бол зэсийн баялгаараа Канад, Хятадын зэсийн ордын ард дэлхийд гуравд эрэмблэгдэж буй арвин баялагтай орд. Хожиж буй нь Рио Тинто. Дэлхийд зэсийн монополь тогтоогч нь мөн л тэд болж буй. Харин Рио Тинтод ийм том баялгаа найр тавьсан Монгол улсын эдийн засаг нь элгээрээ хэвтэж байна. Татварт ч өөрчлөлт оруулж чадсангүй. Ийм байхад бид баатарлаг гавьяа байгууллаа гэж Оюун-Эрдэнийг хөөрөгдөх нь нэг л биш... Оюун-Эрдэнэ ерөнхий сайд Рио Тинтод хөл алдаж Далд уурхайн нээлтэнд биеэр оролцсон бол УИХ Занданшатар Рио Тинто компанийн удирдлагыг ордонд хүлээн авч, баяр хүргэлээ. Энэ нэг л биш ээ... Бид өр тэглэлээ гэдэгт хоосон хөөрцөглөх биш, харин ч баялгаа нэхэх ёстой. Ингэхэд Рио Тинто компанийн олборлосон Монголын алт, эрдэнэс хаана байна вэ? Үүнийг л бид нэхэх, асуух ёстой..
Ц.ЭНХБАТ
