ЦЕГ-аас гаргасан ялын хугацаа дуусаагүй гэх дүгнэлтийг үндэслэн СЕХ-ноос МАХН-аас нэр дэвшигч, тус намын дарга Н.Энхбаярыг 2016 оны УИХ-ын сонгуульд бүртгэхээс татгалзсан юм.
Тэгвэл дээрх шийдвэрийг эс зөвшөөрч захиргааны хэргийн давж заалдах шатны шүүхэд хандсан. Харин өнөөдөр Нийслэлийн захиргааны хэргийн давж заалдах шатны шүүхийн танхимд уг асуудлыг хэлэлцэж шүүх бүрэлдэхүүн цагдаагийн ерөнхий газрыг хариуцагчаар татах шаардлагатай гэж үзэж шүүх хурлыг 10 хоногоор хойшлууллаа.
Шүүх хурал дууссаны дараа Н.Энхбаяраас шүүхийн шийдвэрийн талаар байр суурийг нь сонслоо.
-Шүүхийн шийдвэртэй хэр санал нийлж байна вэ?
Энэ шүүх хурал хэлбэрийн хувьд зөв юм шиг боловч агуулгын хувьд санал нийлэхэд хэцүү шийдвэр байна. Аль ч талаасаа аваад үзэхэд хэлбэр агуулга хоёр таарч байх ёстой. Хэрэв аль нэг нь давамгайлбал энэ бол цэвэр тоглоом байдаг. Энэ сунжирсаар байгаад сонгууль дуустал үргэлжлэх байх. Тэгээд сүүлд нь сонгууль дууссан учир шүүх энэ асуудлыг авч хэлэлцэх боломжгүй гэж жүжиглэнэ. Үүнийг цаг хожих, дээрээс өгсөн үүрэг даалгаврыг гүйцэлдүүлэх арга гэж хэлж болно. 2009 оны өршөөлийн хуулийн 263-р зүйлээр би ялгүй болсон. Гэтэл зөвхөн цагдаагийн байгууллага л намайг ялтай гэж хардаг. Жишээ аваад хэлье л дээ. Энэ машиныг ял гэж харвал ялтай байдал бол түүний сүүдэр гэсэн үг. Гэтэл машиныг нь өршөөгөөд алга болгочхоод байхад цагдаагийн байгууллага сүүдрийг нь байна гэж зүтгээд байгаа юм. Цагдаагийн байгууллагаас өөр хэн ч үүнийг ял гэж харахгүй.
-СЕХ цагдаагийн байгууллагын бичгийг харгалзахаас гадна Үндсэн хуулийн сонгох, сонгогдох эрхийг харгалзаж үзэх ёстой. Хүний эрхийн үндэсний комисс нь Энхбаяр гэдэг хүн ялгүй сонгуульд нэр дэвших эрхтэй гэсэн дүгнэлтийг гаргачхаад байхад СЕХ үүнийг огт авч хэлэлцэхгүй цагдаагийн байгууллагын дүгнэлтийг үндэслэж сонгуульд оролцуулах хүмүүсийн нэрсийн жагсаалтаас хассан.
А.САЯН