Оросын эзлэн авсан Крымын хойгийг Оросын эх газартай холбодог Крымын (Керчийн) гүүр хоёр дахь өдрөө дараалан Украины цохилтод өртлөө. Даваа гарагийн шөнөөс мягмар гарагт шилжих шөнө өгсөн хоёр дахь цохилтын дараа гүүрний замын нуман хэсэг болон түүний доорх дамжлага далайд нурж унасан болохыг Украины албаныхны нийтэлсэн дүрс харуулж байна гэж BBC мэдээллээ.
Оросын Тээврийн яам гүүрний авто зам болон төмөр замын хэсгийн хөдөлгөөнийг хоёуланд нь түр зогсоосон болохыг баталж, мэргэжилтнүүд хохирлын хэмжээг үнэлж байгаа гэж мэдэгдэв. Оросын тал бүтэц дроны цохилтоос эвдэрснийг хүлээн зөвшөөрч, Шадар сайдаар ахлуулсан Засгийн газрын комисс хуралдахаар болж, Мөрдөн байцаах хороо нь терроризмын хэрэг үүсгэн шалгаж эхэлжээ.
Украины Аюулгүй байдлын алба (СБУ) энэ нь нэг сар орчим үргэлжилсэн, долоон үе шаттай тусгай ажиллагаа байсан бөгөөд нэг металл нумыг болон түүний доорх замын дамжлагыг бүрэн устгасан гэж мэдэгдлээ. Тус албаны мэдээлснээр замын хэсэг бүрэн ажиллагаагүй болж, нэг ч тээврийн хэрэгсэл нэвтрэх боломжгүй болсон бол төмөр замын хэсэг нь нумыг гэмтсэн ч хэвээрээ байгаа аж. Энэ нь гүүр рүү өгсөн дөрөв дэх цохилт гэж СБУ онцолсон байна.
Украины Ерөнхийлөгч Володимир Зеленский цохилтыг баталж, энэ нь Украины дэд бүтэц, тэр дундаа гүүрнүүд рүү Оросын өгч буй цохилтын хариу гэж мэдэгдэв. Reuters агентлагийн мэдээлснээр энэ удаагийн довтолгоо нь дайн эхэлснээс хойших Украины хамгийн том дроны довтолгоонуудын нэг байж болзошгүй бөгөөд Оросын тал 22 бүс нутагт 1,441 дрон устгасан гэж мэдээлжээ.
Хүний хохирлын талаар мэдээлэл зөрж байна. Крымын Оросын талын захирагч Сергей Аксёнов сүүлийн цохилтоор хоёр хүн амиа алдсан гэж мэдэгдсэн бол Оросын Тээврийн яам урьдчилсан мэдээллээр хохирогч байхгүй гэж мэдээлжээ. Reuters агентлаг гүүрний нурсан хэсгийг харуулсан дүрсийг бие даан баталгаажуулж чадаагүй гэдгээ онцолсон байна.
Крымын гүүр нь 2014 онд хойгийг нэгтгэсний дараа Оросын барьсан, Ерөнхийлөгч Владимир Путины биечлэн нээсэн бэлгэдлийн шинжтэй байгууламж бөгөөд Крымыг хангах гол зам юм. Даваа гарагийн эхний цохилтын дараа Кремль хохирлыг бага гэж мэдэгдэж, хөдөлгөөнийг хязгаарлагдмал байдлаар сэргээж байсан ч хоёр дахь цохилтын дараа гүүр бүрэн хаагдлаа.
Үүний зэрэгцээ Орос Киев хотын Днепр мөрөн дээгүүрх гүүрнүүд болон бусад дэд бүтэц рүү цохилт өгч, Украины найман мужид цахилгаан тасалдсан гэж Reuters мэдээлэв. Гүүрний засвар хэр удаан үргэлжлэх нь одоогоор тодорхойгүй байна.
Эх сурвалж: Reuters; BBC; Украины Аюулгүй байдлын алба (СБУ), 2026.11.17