ЧАНАРГҮЙ ЗЭЭЛ 2.6 ИХ НАЯД ТӨГРӨГТ ХҮРЧ ӨСЛӨӨ

25 минутын өмнө  

Үндэсний статистикийн хороо Монгол Улсын нийгэм, эдийн засгийн 2026 оны эхний 10 сарын голлох үзүүлэлтүүдийг 11 дүгээр сарын 17-нд танилцуулсан байна. Түүний дотор мөнгө болон зээлийн үзүүлэлтүүд нь иргэдийн халаасанд шууд хамаатай дүр зургийг харуулжээ. Бүх тоо нь урьдчилсан гүйцэтгэл бөгөөд 10 дугаар сарын эцсийн байдлаар тооцогдсон юм.

Хамгийн анхаарал татсан үзүүлэлт бол чанаргүй зээлийн өрийн үлдэгдэл юм. Энэ нь 2026 оны 10 дугаар сарын эцэст 2.6 их наяд төгрөгт хүрч, өмнөх оны мөн үеэс 302.1 тэрбум төгрөгөөр буюу 13.1 хувиар, өмнөх сараас 50.9 тэрбум төгрөгөөр буюу 2.0 хувиар өссөн байна. Чанаргүй зээл нь нийт зээлийн өрийн үлдэгдлийн 5.2 хувийг эзэлж байна.

Үүний зэрэгцээ нийт зээлийн үлдэгдэл ч өсөж байна. Нийт зээлийн өрийн үлдэгдэл 50.3 их наяд төгрөгт хүрч, өмнөх оны мөн үеэс 6.5 их наяд төгрөгөөр буюу 14.9 хувиар, өмнөх сараас 649.6 тэрбум төгрөгөөр буюу 1.3 хувиар өссөн байна. Зээлийн бүтцээр авч үзвэл нийт үлдэгдлийн 59.3 хувь нь иргэд, 39.2 хувь нь хувийн байгууллага, 1.0 хувь нь төрийн байгууллага, 0.5 хувь нь санхүүгийн байгууллага болон бусад байгууллагынх байгаа юм.

Хэвийн зээлийн өрийн үлдэгдэл 46.5 их наяд төгрөгт хүрч, өмнөх оны мөн үеэс 6.9 их наяд төгрөгөөр буюу 17.3 хувиар өсжээ. Хэвийн зээл нь нийт зээлийн 92.5 хувийг эзэлж байна. Харин анхаарал хандуулах зээлийн өрийн үлдэгдэл 1.1 их наяд төгрөг болж, өмнөх оны мөн үеэс 622.7 тэрбум төгрөгөөр буюу 35.1 хувиар буурч, нийт зээлийн ердөө 2.3 хувийг эзэлж байна. Өөрөөр хэлбэл эргэлзээтэй ангилалд шилжих зээл багасч байгаа ч аль хэдийн чанаргүй болсон зээлийн хэмжээ нэмэгдэж байгаа нь хоёр өөр чиглэлийн дохио болж байна.

Мөнгөний нийлүүлэлт (M2) ч мөн өсөлттэй байна. 10 дугаар сарын эцэст M2 55.9 их наяд төгрөгт хүрч, өмнөх оны мөн үеэс 11.5 их наяд төгрөгөөр буюу 26.0 хувиар өсжээ. Үүнд төгрөгийн хадгаламж 6.0 их наяд төгрөгөөр буюу 25.2 хувиар, валютын харилцах 3.3 их наяд төгрөгөөр буюу 82.8 хувиар, төгрөгийн харилцах 2.5 их наяд төгрөгөөр буюу 24.8 хувиар өссөн нь голлон нөлөөлсөн байна.

Төгрөгийн хадгаламж энэ оны эхний 10 сард 30 их наяд төгрөгт хүрч, өмнөх оны мөн үеэс 6.0 их наяд төгрөгөөр буюу 25.2 хувиар өсжээ. Үүний 24.0 их наяд төгрөг буюу 80.2 хувь нь иргэдийн хадгаламж, 5.9 их наяд төгрөг буюу 19.8 хувь нь аж ахуйн нэгж, байгууллагын хадгаламж байна. Валютын хадгаламж 5.1 их наяд төгрөг болсон бол гүйлгээнд гаргасан бэлэн мөнгө 1.3 их наяд төгрөгт хүрч, жилийн өмнөхөөс 5.8 хувиар өссөн байна.

Энэ үзүүлэлтүүд нь зээл олголт эрчимтэй тэлж байгаа ч түүний дагаад эргэн төлөгдөхгүй зээлийн хэмжээ ч нэмэгдэж байгааг харуулж байна. Зээл авсан иргэд болон аж ахуйн нэгжүүдийн хувьд энэ нь эргэн төлөлтийн дарамт, хүүгийн ачаалал нэмэгдэж болзошгүйг сануулж байгаа бол банкуудын хувьд эрсдэлийн удирдлагаа чангатгах шаардлагатайг харуулж байна. Цаашид Монголбанк болон арилжааны банкууд чанаргүй зээлийн өсөлтийг хэрхэн тогтворжуулах нь анхаарлын төвд байх болно.

Та юу гэж бодож байна: чанаргүй зээл ийнхүү өсөж байгаа нь зээл олголт хэт хурдан тэлсний шинж үү, эсвэл эдийн засгийн өсөлтийн хажуу дахь хэвийн үзэгдэл үү?

Эх сурвалж: Үндэсний статистикийн хороо, ikon.mn — 2026-11-17

Мэдээ уншаад таалагдсан бол Like дарна уу. Танд баярлалаа
Сайт таалагдаж байвал Like дарна уу. Танд баярлалаа
Төстэй мэдээ
Шинэ мэдээ
Санал асуулга
ГАДААД УЛСЫН АЖИЛЧИДАД ХЯЗГААР ТОГТООХГҮЙГ ТА ДЭМЖИЖ БАЙНА УУ?