Арабын Нэгдсэн Эмират улсын Фужейра эмиратад өнгөрсөн шөнө олон машин мөргөлдсөн ноцтой осол гарч, 14 хүн амиа алдсан талаар тус улсын Дотоод хэргийн яам пүрэв гарагт мэдээллээ. Осол Шейх Халифа бин Зайед гудамжинд, эмиратын орцон дээр шөнө дундын өмнөхөн гарсан байна.
Фужейрагийн цагдаагийн газрын мэдээлснээр ачааны машины жолооч жолоогоо алдаж, эхлээд нэг машиныг мөргөж онхолдуулсан бөгөөд дараа нь хөдөлгөөн удааширсан тул зогсож байсан олон машиныг мөргөжээ. Мөргөлдөөний дараа ачааны машинд гал гарч, гал нь гэмтсэн хэд хэдэн машинд тархсан байна.
Осолд нийт 23 тээврийн хэрэгсэл — 18 машин, 5 ачааны машин өртсөн гэж Дотоод хэргийн яам мэдээлсэн бөгөөд урьдчилсан мэдээгээр 14 хүн амиа алдаж, 30 хүн янз бүрийн хүндэвтэр бэртэл авчээ. Бэртсэн 30 хүнээс 15 нь шаардлагатай эмнэлгийн тусламж авсны дараа эмнэлгээс гарсан байна.
Амиа алдсан хүмүүсийн дунд Эмиратын иргэд байгаа бөгөөд зарим хохирогчийн хэн болохыг ДНХ-ийн шинжилгээгээр тогтоож байгаа аж. Харин бэртсэн хүмүүсийн дунд Эмират, Оман, Энэтхэг, Бразил, Пакистан, Иордан болон Египет улсын иргэд байгаа талаар цагдаагийн газар мэдээлжээ.
Энэтхэгийн Дубай дахь Ерөнхий консулын газар амиа алдсан хүмүүсийн дунд Энэтхэгийн иргэд байгааг баталж, хохирогчдын гэр бүлд тусламж үзүүлэхээр орон нутгийн эрх бүхий байгууллагуудтай хамтран ажиллаж байгаагаа мэдэгдсэн байна.
Ослын газарт цагдаа, түргэн тусламж болон иргэний хамгаалалтын албаныхан шуурхай ажиллаж, галыг унтраан, бэртсэн хүмүүсийг эмнэлэгт хүргэжээ. Дотоод хэргийн яам амиа алдсан хүмүүсийн гэр бүлд гүн эмгэнэл илэрхийлж, бэртсэн хүмүүст хурдан эдгэрэхийг хүссэн байна.
Цагдаагийн байгууллага ослын шалтгааныг тогтоох шалгалтыг үргэлжлүүлж байгаа бөгөөд иргэдийг зөвхөн албан ёсны эх сурвалжаас мэдээлэл авч, баталгаагүй тоо баримт, цуурхал тараахгүй байхыг уриалжээ. Мөн жолооч нарт хурдны хязгаарыг баримталж, түгжрэлтэй хэсэгт аюулгүй зай барьж явахыг онцгойлон анхааруулсан байна.
Энэ удаагийн осол нь сүүлийн жилүүдэд тус улсад гарсан олон хүний амь хохирсон зам тээврийн ослуудын нэг болж байна. Шалгалтын дүн болон хохирогчдын талаарх мэдээлэл шинэчлэгдэх бүрд Control TV уншигчдадаа хүргэх болно.
Эх сурвалж: Reuters; АНЭУ-ын Дотоод хэргийн яам; Фужейрагийн цагдаагийн газар; The National; Khaleej Times; Gulf News, 2026.11.12
