«Фунг-вонг» (орон нутагтаа «Уван») супер хар салхи Филиппиний баруун хойд нутгийг дайран, даваа гарагт Өмнөд Хятадын тэнгис рүү гарлаа гэж тус улсын цаг уурын алба мэдээллээ.
Албаныхны сүүлийн мэдээгээр хар салхины улмаас наад зах нь 8 хүн амиа алдаж, 1.4 сая гаруй хүн орон гэрээ орхин нүүн шилжсэн бөгөөд тэдгээрийн 318 мянга нь нүүлгэн шилжүүлэх төвүүдэд байрлаж байна.
Катандуанес мужид нэг хүн үерийн усанд живж, зүүн Самарын Катбалоган хотод нэг эмэгтэй нурсан байшингийнхаа нурангид дарагдаж амиа алдсан бол хойд нутгийн Нуэва Виская мужид хөрсний гулгалтын хоёр удаагийн тохиолдлоор гурван хүүхэд амиа алдаж, дөрвөн хүн бэртжээ.
Мөн Уулын мужийн Барлиг хотод хөрсний гулгалтад нэг өндөр настан амиа алдсан бол Калинга мужийн Лубуаган хотод хөрсний гулгалтын улмаас хоёр оршин суугч амиа алдаж, хоёр хүн сураггүй болсон тухай мужийн албаныхан мэдээллээ.
185 км/цагийн тогтвортой салхи, 230 км/цаг хүрсэн хүчтэй салхитайгаар ням гарагийн орой Аврора мужийн Диналунган хотод газардсан хар салхи үер, хөрсний гулгалт үүсгэж, бүхэл бүтэн мужуудын цахилгаан хангамжийг тасалдуулсан байна. 400 гаруй нислэг цуцлагджээ.
Филиппин улс өнгөрсөн долоо хоногт төв нутгийг нь дайрч 224 хүн амиа алдсан «Калмаеги» хар салхины гамшгийг даван туулж амжаагүй байхад энэ шуурга дахин дайрсан бөгөөд Ерөнхийлөгч Фердинанд Маркос Бага онц байдал зарлаад байгаа юм.
Хар салхи суларч Өмнөд Хятадын тэнгис дээгүүр баруун хойд зүгт, Тайвань руу чиглэн хөдөлж байна гэж цаг уурын алба мэдээлэв.
Эх сурвалж: AP, 2026.11.09
