Нийслэлийн АН ялна гэдэгтээ дэндүү бардсан. Тиймээс "Бат-Үүлийг багаар нь дахиулья" гэсэн гэнэн уриатай сонгуульд оролцсон. Харин иргэд өөр бодолтой байв. Энд ямар ч сурталчилгаа нөлөөлөөгүй.
Хамгийн гол нь өнгөрсөн 4 жилд Бат-Үүлийн баг өөрсдөө хөлжиж хөрөнгөжсөнөөс нийслэлийн ард иргэдийн амьдрал уруудан доройтсон. Тэд өөрсдөө тохирсон шийдвэр гаргах болохоороо иргэдийн санал асуулга гэж нэг юм зохион байгуулдаг. Түүнийгээ иргэд оролцсон гэж ашиглахдаа гаршсан. Аливаа шийдвэрийг иргэдийн нэрийг барьж тулгаж ирсэн. Муйхар арга нь ард иргэдийн эгдүүг хөдөлгөсөн. Тэгээд ч хотын төсвийг хэлэлцэхэд гадаадад томилолтоор оддог хотын даргатай байхыг Улаанбаатарчууд хүссэнгүй.
Өнгөрсөн 4 жил нийслэл Улаанбаатар хот хамгийн өндөр төсөвтэй байсныг сөрөг хүчнийхэн дурдаж ирсэн. Дээр нь нийслэлчүүдэд татварын дарамт нэмэгдсэн. Жагссан, цугласан, өөрийгөө шүүмжилсэн болгоныг шүүх, цагдаад хайр найргүй өгч байсан хүн бол хотын дарга Бат-Үүл байлаа.
Хэдийгээр тэр ерөнхийлөгч Ц.Элбэгдорж, УИХ-ын дарга З.Энхболд, Ерөнхий сайд Ч.Сайханбилэг нарыг "бараг өрөөндөө дууддаг" нөлөөтэй байсан ч, ард иргэддээ ээлгүй дарга байлаа гэж түүнийг дүгнэлээ. Тэр өөрөө дөнгөж 3000 гаруй санал авч, арай чарай сонгогдлоо. Тэр одоо гомдоллох эрхгүй болсон. Цагдаад өглөө, хүний үг хэлэх, хэвлэн нийтлэх эрх чөлөөг боолоо, хүний эрхэнд халдлаа гэж хэлэх эрхгүй боллоо. Тэр 4 жилийн даргын суудлаар ардчиллын үнэт зүйл болох энэ бүхнийг арилжсан байна.
Ц.ЭНХБАТ