Энэ хүн бол Миеэ-Гомбын Энхболд. Үнэмлэхгүй ялалт байгуулсан намын даргын хувиар тэр Монгол Улсын ерөнхий сайдаар 2 дахь удаагаа томилогдоно. М.Энхболд бол Ч.Сайханбилэг биш. Ч.Сайханбилэг намын дарга ч биш, удирдагч ч биш, өөрийн толгойгүй байсан. Тэр юу ч хийж чадаагүй. "Эдийн засаг, эдийн засаг, бас дахин эдийн засаг" гэж хэлж гарч ирсэн, түүндээ ч хүрсэн. Хулгайгаар шахам явж байж Дубайн гэрээ гэгчийг байгуулсан бол, түүний хамгийн сүүлийнх нь эдийн засгийн далд "операц" бол Эрдэнэт Үйлдвэрийн 49 хувийг сэмхэн хувьд "гулсуулсан" үйлдэл байлаа.
Эргэн харахад, Ч.Сайханбилэг гэж хувь хүн өөрийн эдийн засгаа ярьснаас, Монгол улсын эдийн засгийг яриагүй бололтой. Ийм л ерөнхий сайдаас М.Энхболд халаа авах гэж байна. Нэгэн цагт ерөнхий сайдаасаа буухдаа сан хөмрөг арвинтай данс тооцоог одоогийн ерөнхийлөгч Ц.Элбэгдоржид өгч байсан бол өнөөдөр данс нь улайсан, өр ширний зузаан дэвтрийг Ч.Сайханбилэгээс гардан авах хувь тавилантай байжээ. Ч.Сайханбилэг улс орны дансыг ч улайлгаад зогсохгүй, АН-аа, гишүүдээ ч хөөдөөд буулаа.
Харин М.Энхболд бол удирдагч. Хотын даргаар, ерөнхий сайдаар ажиллаж байсан туршлагатай. Өөрийн гэсэн багтай. Итгэж чаддаг зан чанартай. Энэ бүхэн нь түүнд давуу тал олгож байна. Удахгүй М.Энхболдын нөлөө улам нэмэгдэнэ. Яагаад гэвэл, М.Энхболдыг ерөнхий сайдаар томилогдсон цагаас эхлэн Ц.Элбэгдорж ерөнхийлөгчийн нөлөө буурч эхэлнэ. Ц.Элбэгдорж энэ удаа ерөнхий сайдын томилгоонд саад хийж чадахгүй.
Ц.БАТТУЯА