Гурван "Э"-гийн эрин үе эхэлж байна. Ц.Элбэгдорж ерөнхийлөгч, М.Энхболд ерөнхий сайд, Н.Энхболд УИХ-ын дарга. Ялсан намын даргын хувьд, 60 гаруй гишүүнтэй даргын хувьд М.Энхболд хамгийн хүчирхэг ерөнхий сайд болно. Түүний засгийн газар 4 жил тогтвортой ажиллах нь тодорхой болсон учраас Оюутолгойн хувьцааны үнэ дэлхийн зах зээл дээр сүүлийн хоногуудад өсөж эхэлсэн байна.
Харин УИХ-ын дарга хэн байх вэ? гэдэг бол асуудал. Болох бодолтой хүн олон бий гэдэг нь ойлгомжтой. Гэхдээ, мэргэшсэн нь чухам хэн бэ?
Д.Лүндээжанцан, Ц.Нямдорж нарын " архаг" хуульчид байж болох. Гэвч тэд нар УИХ-ын даргаар хэрхэн ажиллаж байсныг мэднэ. МАН энэ удаа парламентад мэргэшсэн "шинэ" хүний "эрэлд" морджээ. Туршлагатай, гадаад, дотоодод нэр хүндтэй, гишүүдээ зөв залаад, хурлаа удирдаад, алсын хараатай бодлого баримталж чадах ийм л хүнийг эрж хайж буй ажээ. МАН-д 60 гаруй гишүүн байгаа ч, шүүж тунгаавал, цөөн хүн үлдэнэ. Тэр цөөн дундаас тавьж буй бүх шалгуурт нийцэх цорын ганц хүн бол Нямаагийн Энхболд гэж судлаачид дүгнэж байна.
Тэр парламентад 5 удаа сонгогдсон туршлагатай , мэргэшсэн парламентач. Өнгөрсөн парламентад дэд даргаар ажилласан. Монгол улсын парламентыг олон улсад төлөөлдөг цорын ганц парламентын гишүүн. Олон улсын парламентын гүйцэтгэх хорооны сонгуультай. Тэр утгаараа Олон улсын парламентад танигдаж, зөвшөөрөгдсөн улс төрч. Дээр нь Улсын их хурал бол бодлого боловсруулдаг дээд байгууллага. Гадаад бодлого ч бас УИХ-ын хуралд хамааралтай. Гадаад хэргийн сайдаар ажиллаж байсан Н.Энхболдын туршлага ч парламентад бас хэрэгтэй. Энэ бүхнээс үзвэл, Нямаагийн Энхболд шинээр бүрэлдэх УИХ-ын даргаар сонгогдох нь гэдэг ортой болох нь. УИХ-ын дарга Зандаахүүгийн Энхболдын үүрэгт ажлыг Нямаагийн Энхболд үргэлжлүүлэх нь.
Парламентын сэтгүүлч Л.ГАНТУЯА