2016 он гарсаар эхний зургаан сарын байдлаар улсын хэмжээнд зам тээврийн ослын улмаас 143 хүн амиа алджээ. Үүнээс 37 нь хотод осолдож амиа алдсан бол үлдсэн 106 хүн нь орон нутгийн замд харамсалтайгаар эндсэн байна. Зөвхөн зургадугаар сард гэхэд орон нутгийн замд 43 хүн зам тээврийн ослын улмаас амь эрстжээ.
Амралт зугаалгаар хөдөөг зорих хөдөлгөөн эрс ихэсдэг энэ үед зам тээврийн осол нэмэгддэг гэдгийг албаныхан хэлж байна. Энэ нь жолооч нар хотоос гараад л хурд хэтрүүлдэг, согтууруулах ундаа хэрэглэдэг, суудлын тооноос илүү зорчигч тээвэрлэдэг, анхаарал нь сулардаг зэргээс үүдэлтэй аж. Мөн холын замд техникийн бүрэн бүтэн байдлаа хангаж яваагүйгээс ч нэлээд осол гардаг байна.
Тиймээс иргэд орон нутгийн замд замын хөдөлгөөнд оролцохдоо замын нөхцөлд хөдөлгөөний хурдыг зөв тохируулан аюулгүй байдлаа сайтар хангаж анхаарал болгоомжтой зорчихыг сэрэмжлүүлж байна.
А.САЯН