Засгийн газрын тэргүүн томилогдсоноос хойш 14 хоногийн дотор ангиа бүрдүүлэх хуультай. Шинэхэн засгийн тэргүүн томилогдсоноос хойш улсын их баяр наадам эхэлж, үргэлжлүүлэн АCЕМ-ын дээд хэмжээний уулзалт залгуулан болж засаг бүрдүүлэх хугацаа дуусахад ганцхан хоног үлдсэн байлаа. Сүүлчийн өдөр нь хуулийн хугацаанд засгаа бүрдүүлэх нэрээр МАН чуулганы хурлыг шөнө дөл болтол хуралдуулж Ерөнхийлөгч татгалзсан ч засгийн газрын бүтцийг өөрсдийнхөө санаснаар өргөн барьчихлаа.
УИХ-д олонх болсон МАН мэдээж олохоороо аархан батлах нь тодорхой болж байна. Өнгөрсөн хугацаанд төрийн албаны данхар бүтэц тэр дундаа олон дэд сайд дарга нарын орон тоог цөөлөх ёстой гэж сөрөг хүчин байхдаа үргэлж шаарддаг байсан МАН-ынхан өнөөдөр бүх яамд дэд сайдтай байх ёстой гээд сууж байна. Тухайлсан яамдад сайд нь бодлогоо чиглүүлэн ажиллаж төрийн нарийн бичгийн дарга нь салбарынхаа бусад асуудлыг гардан хийж байхад дэд сайдын орон тоо үнэхээр тэнд шаардлагагүй. Салбар яамдын гол ажлыг үнэндээ мэргэшсэн төрийн албан хаагчид л хийдэг. Тэд хууль тогтоолоо боловсруулж, салбарынхаа эд ширхэг бүрт нь хүрч ажилладаг.
Гэтэл Ерөнхий сайд Ж.Эрдэнэбат “Шинэ бүтцээр 1238 хүн орон тоог цомхтгоно" гэж байна. Эргээд шинэ бүтцээр нь 360 гаруй хүний шинэ ажлын байрыг бий болгох боломжтой” гэдэг нь өнөөх олон дэд сайд нар тэдний туслах, жолооч зөвлөх нэртэй ажлаа мэддэггүй цүнх баригчид болж таарна. Шинээр яамдад очсон тэдгээр хүмүүс доошоо гэмгүй ажлаа хийж яваа төрийн албан хаагчдын оронд хамсаатнуудаа авч яамны бүтэц орон тоогоор тоглож эхэлдэг. Шууд хоморголоод халчихгүй ч тэдэнд олон арга байдаг.
Хийж байгаа ажлыг нь өдөр бүр шалгаж, үүрэг даалгаврыг цаг минутын хугацаа заан тулгаж, заасан хугацаанд нь биелүүлэхгүй бол алба хэлтсийн дарга нараар нь арга хэмжээ авахуулна. Өглөө ажилдаа ирэх цагийг нь секунд долиор хэмжиж долоо хоног, сарын эцэгт ажлаасаа хоцорсон секунд бүрийг нь нэмж үржүүлээд арга хэмжээ авна.
Хөдөө томилолтоор явсан өдөр хоногийг ч мэдсээр байж тасалсан цагаар тооцож арга хэмжээ авах жишээтэй. Энэ мэт байдлаар хоёроос гурван удаа арга хэмжээ авахуулсан албан хаагчыг эцэст нь яамны дотоод журам, бусад хууль тогтоомж уншаад л төрийн нарийны тушаалаар ажлаас нь чөлөөлнө. Ингээд л өөрийн хүнээ оронд нь ажилд авна.
Ажлаасаа халагдсан төрийн албан хаагч шүүх цагдаагаар гомдол мэдүүлээд ч нэмэргүй. Анхнаасаа зохион байгуулалттайгаар тэд шат дараатай сахилгын арга хэмжээ авчихсан гээд сууж байна. Өөр нэг арга нь бол ажлаас нь халахаар онилсон төрийн албан хаагчаар ямар ч ажил хийлгэхгүй байх. Өөрийнх нь хийх ажлыг бусдаар хийлгэж үргэлж чи хэрэггүй, чи чадахгүй гэж явуулсаар эцэс сүүлд нь өөрөөр нь халагдах өргөдлийг нь бичүүлэх. Бүх яамдад энэ төрлийн ажлаас халах явдал хоёр гурван сарын дараагаас гарч эхлэх нь тодорхой.
Л.ГАНТУЯА