Аялал зугаалга амралтын өдрүүд үргэлжилж байгаа энэ өдрүүдэд иргэд тарваган тахлын голомтод бүсүүдээр аялахдаа байгалийн голомтод тахлаас урьдчилан сэргийлэх үүднээс вакцинжуулалтад хамрагдах нь маш чухал.
Манай улсын 17 аймгийн 137 сум тарваган тахлын байгалийн голомттой. Ялангуяа Алтай, Хангай, Хэнтийн нурууг дагасан нутагт голомт их байдаг байна. Гоц халдварт тарваган тахал өвчний дэгдэлтийн оргил үе нь 7-10-р сард байдаг. Тиймээс жил бүр орон даяар тарваган тахлын вакцинжуулалтыг хийдэг. Энэ жил тарваган тахал өвчний эсрэг дархлаажуулалт энэ сарын 18-аас эхэлсэн бөгөөд 7-р сарын 28-ны өдөр хүртэл явагдах юм.
Дархлаажуулалтад, тарваган тахлын голомтот нутгийн хүн ам, малчид, зорчигчид, эрүүл мэндийн байгууллага, онцгой байдал, мэргэжлийн хяналт, хууль сахиулах байгууллагын ажилтнууд хамрагдах шаардлагатай. Түүнчлэн 6-аас дээш насныханд тарих заалттай. Иймд иргэд та бүхнийг оршин суугаа газрынхаа харьяа эрүүл мэндийн байгууллагуудад хандахыг Зоонозын өвчин судлалын үндэсний төвөөс зөвлөж байна. Иргэд сайн дураараа дархлаажуулалтад хамрагдах боломжтой юм.
