Ерөнхий сайд хуулийн хугацаандаа засгаа бүрдүүлж чадаагүй. Сайдад нэр дэвшүүлсэн хүмүүсээс дөрвийг нь ашиг сонирхлын зөрчлийн улмаас буцаасан. Ард түмэн МАН-аас мэргэжлийн засгийн газар бүрдүүлэхийг л хүлээж байгаа. МАН ч тийм амлалт өгч энэ удаагийн сонгуульд ялсан. Мордохын хазгай гэгчээр сайдад нэр дэвшүүлсэн эрхмүүд нь чуулганы босго давалгүй олон нийтийн шүүмжлэлд өртөж, улайн цайм зүтгүүлсэн дөрвөн нөхрөө буцаан татсан. Оронд нь МАН нэрээ бодсон томилгоо хийх учиртай. Эх сурвалжуудын мэдээлж байгаагаар тунаж үлдсэн дөрвөн сайдын суудалд доорх хүмүүсийн нэр цухалзаж байна.
Эрүүл мэндийн сайдад Хавдар судлалын үндэсний төвийн захирал Ц.Төмөрбаатарыг зүтгүүлж байна. Тэрээр Хавдар судлалын үндэсний төвийн захирлын албыг олон жил хашсан. Мөн Монголын сүрьеэтэй тэмцэх нийгэмлэгийн тэргүүн байсан өмнөх засгийн үед Эрүүл мэнд, спортын яамны Төрийн нарийн бичгийн даргын албанд нэр нь дуулдаж явсан нэгэн.
Харин Хүнс хөдөө аж ахуй, хөнгөн үйлдвэрийн сайдад, дэд сайд асан Ж.Саулег сойж байгаа сурагтай. Саулегийн хувьд Улсад 28 жил ажилласан. Тэрээр 2003-2008 онд Засгийн газрын хэрэг эрхлэх газарт референт 2008-2012 онд хуучнаар Хөдөө аж ахуйн яамны дэд сайдаар 2012 оноос өнөөг хүртэл, МАН-ын Генсекийн зөвлөх, Зөвлөхүүдийн танхимын нарийн бичгийн даргаар тус тус ажиллаж байгаа. Хөдөө аж ахуйн салбарын хүндхэн үед дэд сайд байсан түүнийг дэвшүүлж байгаа нь нүдээ олж байгаа хэрэг.
Эрчим хүчний сайдад МАН-ын нарийн бичгийн дарга Т.Гантулга яригдаж байна. Өмнө нь хөдөө аж ахуй яамны Төрийн нарийн бичгийн даргаар ажиллаж байхдаа сайн ажиллаж чадаагүй гэсэн үнэлгээг авч байсан удаатай.
Барилга хот байгуулалтын сайдад УИХ-ын гишүүн Д.Цогтбаатарын нэр дуулдаж байна. Давхар дээлтэй засаг байгуулахгүй гэдгээр бол томилогдох боломжгүй баймаар ч өнөөдөр тамга тэмдгээ гардаад байгаа шинэхэн сайд нарын найм нь давхар дээлтэй нөхдүүд байгаа тул МАН зүтгүүлээд томилох биз.
Л.ГАНТУЯА
