Монголын нэртэй бөх, нэртэй бизнесмен Х.Баттулга улс төрийн тахимаа өгсөн. Түүнийг хүчинд автсан гэж хэвлэлийнхэн ярьдаг. Төрийн машин түүний эсрэг хөдөлсөн гэж ч түүний эргэн тойрныхон хэлдэг. Ямар ч байсан Х.Баттулгын улс төрийн карьерт цэг хатгасан. Түүнээс одоо МоАХ-г нь авна. Жудо бөхийн холбоо түүнд хамааралгүй болох цаг ойрхон. Х.Баттулгын ойр тойрны шадар хүмүүсийг барьж хорьж, яллагдагчаар татсан. Хамгийн сүүлд сайд асан буурал хэмээх А.Гансүхийг яллагдагчаар татсан мэдээлэл бий. Х.Баттулгын бүлгийг улсад онц их хэмжээний хохирол учруулсан хэргээр шалгаж эхэлсэн. Хамаарал бүхий Солонгосын компаниудыг ч татаж, зарим удирдлагыг саатуулан шалгасаар буй. Х.Баттулгын хувьд УИХ-ын гишүүнийхээ бүрэн эрхээс хагацсан тул одоо түүнийг хэзээ ч байцаах үүд хаалга нээгджээ. Түүнийг Олимп явахыг нь хориглосон. Ямар ч гэсэн эрхийг нь хязгаарлах ажил эхэлсэн. Энэ бүхнийг Х.Баттулга сайн мэдэж байсан тул Баянхонгорт үхэх сэхэхийн төлөө Л.Элдэв-Очиртой үзэлцсэн. Тэр үхэх сэхэхийн төлөөх тулалдаанд ялагдсан. Баттулга үүнийгээ мэдэрч, Монголын Тусгаар Тогтнолын Намыг байгуулж, даргаар нь Г.Уянгыг тавьж, жудочдоо дэвшүүлсэн. Түүний улс төрийн хоёр дахь хувилбар ч ажиллаагүй. Одоо тэр шалгуулах л үлдлээ. Хууль хяналтынхны гарт Х.Баттулгын холбогдол бүхий хөдөлшгүй баримт орсон тул, энэ дэгээнээс мултрах гэдэг амаргүй гэж хөндлөнгийн ажиглагчид дүгнэлт хийжээ.
Жудогийн тамирчид энэ сарын 28-нд Рио-2016 олимпийг зорино. Харин Х.Баттулгыг Рио явсан, яваагүй гэдгийг хэлж мэдэх хүн албаны эх үүсвэр алга. Түүнийг нэгэнт яллагдагчаар татсан учраас хил давахыг оролдвол зугтаахыг оролдсон гэсэн зүйл ангиар хорих хуулийн заалттай гэдгийг тэр өөрөө мэднэ.
Ө.ДЭЛГЭР