Ховд аймгийн ИТХ-ын Анхдугаар хуралдаан аймгийн Засаг даргаа томилох асуудлаар 10 хоног завсарлаад байсан.
Тэгвэл өчигдөр хуралдаанаа үргэлжлүүлж, аймгийн Засаг даргад нэр дэвшүүлэх асуудлыг хэлэлцэн баталсан байна. Аймгийн МАН-ын бүлгээс дарга Д.Галсандондогийн нэрийг дэвшүүлсэн бол цөөнх болсон Ардчилсан намын бүлэг аймгийн Засаг даргад нэр дэвшүүлэхээс татгалзлаа. Харин хуралдааны танхимаас МАН-ын бүлгийн гишүүн Аймгийн ИХ-ын төлөөлөгч Б.Амгаланбадрах өөрийн нэрээ нэр дэвшүүлж олонх болсон МАН-ын 2 хүн Аймгийн Засаг даргад нэр дэвшин өрсөлдсөн байна.
Ийнхүү нууц санал хураалтад нийт 41 төлөөлөгч оролцсоноос 60,97 хувь буюу 25 Төлөөлөгч нь МАН-ын хорооны дарга Д.Галсандондогийг дэмжиж Ховд аймгийн Засаг даргаар томилуулахаар Монгол Улсын Ерөнхий сайдад өргөн мэдүүлэхээр тогтоолын төслөө баталлаа. Ховд аймгийн ИТХ 41 мандаттай. Үүний 24-ийг нь МАН, 17-г нь Ардчилсан нам авч МАН олонх болсон. Гэвч МАН-ын бүлэг дотроо үзэл бодлын зөрчлөөсөө шалтгаалан нэг шийдэлд хүрч чадаагүйгээс анхдугаар хуралдаанаас нэг биш удаагийн завсарлага авч байж аймгийн ИТХ сонгуулийн дүн гарснаас хойш 25 хоногийн дараа Аймгийн Засаг даргынхаа асуудлыг шийдэж байгаа нь энэ.
Ховд аймгаас Х.АЛТАНТУЯА