Хот бол нэг ёсны улс юм. Нийслэл хот бол тухайн улсын зүрх нь юм. Улс орны хөгжил нийслэлд л буцалж бужигнаж байдаг утгаар нь тэгэж зүйрлэдэг. Зүрх нь болсон нийслэлийг амжилттай удирдаж байсан удирдагчийн хувьд Барилга, хот байгуулалтын сайдын ажил үүрэг түүнд ойрхон.
Энэ талаас нь авч үзвэл, Нийслэл хотын захирагч, засаг даргаар ажиллаж байсан Г.Мөнхбаяр салбарын сайдаар томилогдсон нь барилгын салбарыханд ихээхэн олз юм. Бүхэл бүтэн хотыг удирдаж байсан хүний хувьд салбар хариуцсан сайд буюу Барилга, хот байгуулалтын сайдын үүрэгт ажлыг төвөггүй гүйцэтгэнэ гэж харж болох нь. Барилга, хот байгуулалтын Яам хотын хөгжлийн төлөвлөгөөнөөс хэзээ ч ангид байдаггүй онцлогтой салбар.
Тиймээс Г.Мөнхбаяр сайдын хувьд, хотынхоо даргын ажлыг үргэлжлүүлж байна ч гэж нөгөө өнцгөөс нь бас харж болох. Харин ямар салбарыг өнөөдөр Г.Мөнхбаяр хүлээн авч байна вэ? гэдэг бол өөр асуудал юм. Хотоор л нэг барилга байшин сүндэрлэсэн. Сүндэрлэсэн барилгаар дүгнэвэл, салбар хөгжжээ. Харин яаж гэж асуух хэрэгтэй. Ажиглавал, эзэнгүй, эзнээ хүлээсэн ч барилга их. Хагас дутуу баригдсан, араг яс нь боссон төдий ч барилга энд тэндгүй. Барилгаа барьчихаад борлуулж чадахгүйгээс банкинд барьцаалагдсан, өр ширэнд унаж буй аж ахуйн нэгжүүд ч байна. Ажил хийгээд өрөнд орно гэдэг сонин ойлголт энэ салбарт бий болсон. Ингээд бодохоор хүнд л салбарыг хүлээн авах нь. Барилгын салбар уналтад орсон гэж Монголын барилгачдын холбооны ерөнхийлөгч М.Батбаатар өдөр тутмын сонинд өмнөх сайд асан Цогтбаатар гишүүнийг дахин сайд болоосой гэж лоббидон өгсөн ярилцлагадаа саяхан дурдсан байсан.
Тэр, - "Барилгын салбар системээрээ өрийн сүлжээнд орсон. Мэргэжлийн боловсон хүчингүй болсон. Мэргэжлийн боловсон хүчинг дэмжих бодлого алдагдсан. Мэргэжлийн ажилчид, албан хаагчид ашиггүй ажиллаж, ядуурлын туйлд хүрлээ" гэж салбарынхаа өнөөгийн нөхцөлийг тодорхойлсон. Ийм л салбарыг хүлээн авч байна гэж ойлгож болох нь. Тэгэхээр, Г.Мөнхбаяр сайдад хийх зүйл их байх нь. Салбарын хөгжлийн бодлогоо тодорхойлох нь, мэргэжлийн боловсон хүчнээ дахин сургаж бэлдэх нь, эдийн засгийн үр ашигтай ажиллуулах орчин нөхцөлийг нь бий болгох нь, хөгжлийн төлөвлөгөөг саланги биш, нэгдсэн байдлаар бий болгох, төр нь хувийн хэвшилтэйгээ өрсөлддөг, хувийн хэвшлээ даран нухчидаг тогтолцоог таслан зогсоох гээд дэс дараатай олон ажил шинээр томилогдсон Г.Мөнхбаяр сайдыг тосон хүлээж байна. Г.Мөнхбаяр барилгын салбарыг өлхөн өөд нь татна гэж бизнесийн хүрээнийхэн итгэж байна. Ажлын туршлага, багаараа ажиллах чадвар, хариуцлага, мэдлэг зэргийг түүнээс нэхэх шаардлагагүй. Түүнд энэ бүхэн бий. Барилгын салбарынханд аз түшжээ, Г.Мөнхбаяр тэдэнтэй нэгдлээ.
Ц.ХИШГЭЭ
