Өнөөдөр үдээс хойш цагийн үед МАХН-ын дарга Н.Энхбаярын өрөөнд Авлигатай Тэмцэх газрын 10 гаруй хүн хүч төрөн орж, байцаалт өгөхийг шаардлаа. Тэд өрөөг нь дотроос нь түгжин, намын нөхдийг нь оруулахгүй нэг цаг орчим байсан юм.
УИХ-ын гишүүн асан З.Баянсэлэнгэ, Шадар сайд асан Ц.Оюунбаатар, Н.Энхбаярын хүү Э.Батшугар нарын хүмүүс өрөөнд орох хүсэлтэй байгаагаа илэрхийлж байсан ч АТГ-ынхан оруулсангүй. “Бид ажлаа л хийж байна” гэсэн тайлбартайгаар өрөөнд орох гэсэн хүмүүсийг түрхэн, эмх замбараагүй байдал үүсгэжээ.
МАХН-ын дарга Н.Энхбаяр хэлэхдээ “АТГ дайрсан түрэмгийлсэн хүний эрхийг уландаа гишгэсэн хэвээр байна. Өнөөдөр /08.05/ Хуримын ордон ачаалалтай байлаа. Мөн хэвлэлийнхэн байгаа учраас намайг баривчлах бохир ажиллагаагаа хийж чадсангүй. Миний өрөөнд байсан хүмүүс утсаар байн байн “Орж болохгүй байна уу” гээд л яриад байсан. Удахгүй шөнө оройн цагаар намайг баривчлахаар ирэх биз. Магадгүй ийм олон камерын өмнө би сүүлийн удаа яриа өгч байж мэднэ. Гэхдээ би айхгүй” гэсэн юм.
Харин АТГ-ын ажилтнууд "Н.Энхбаярт тогтоол гардуулахаар ирсэн. Баривчлан саатуулах үйл ажиллагаа явуулахгүй" гэсэн тайлбарыг өгч байлаа. АТГ-ын ажилчид МАХН-ын дарга Н.Энхбаярын албан өрөөнд нэг цаг гаруй болсон юм.
