Дарга болсон нэг нь хэзээ ч Их Хурлаа зарлаж байгаагүй. Сүүлийн хоёр даргын жишгээр үзэхэд л хангалттай. Их хурлаа хийчихвэл уначих гээд байдаг тул суудал дээрээ дэнжигнэхийн тулд хурлаа зарлахгүй байх нь даргад ашигтай байж ирсэн.
Фракцын зөрчилдөөн ихтэй, эрх мэдэлтэй болсон үед нь энэ зөрчил хамгаас хурцаар илэрсэн. Нам дотроо хагарсан, намын удирдлагууд нь намынхаа эсрэг, гишүүд нь гишүүдийнхээ эсрэг ажиллаж чаддаг гэдгээ харуулсан.
12-р сард Их хурлынхаа товыг зарласан тус намынхан одоо хэн нь дарга болох вэ? гэдэг дээр санал нэгдэж чадахгүй байна. УИХ-ын гишүүн Д.Эрдэнэбат, Г.Батхүү нараас гадна Л.Гантөмөрийн нэр ч дуулдаж буй. "АН гэж байхгүй. Хэдэн дээрэмчид УИХ-д АН-ыг төлөөлж байна" гэж цухалдаж байсан Э.Бат-Үүлийн нэр ч бас даргын марафонд сонсогдож эхэллээ.
Гишүүдийн дийлэнх нь, одоогийн ҮЗХ, Хяналтын хороо, Дүрмийн хороо татан буугдах ёстой. Дээр нь АН-ын бүх шатны байгууллагыг ч татан буулгаж, өнөө цагтаа нийцсэн шинэ бүтэц зохион байгуулалтад шилжүүлэх нь зөв гэж тэд үзэж байна. Дарга шүтсэн бус, дүрмээ баримталсан намтай болохыг АН-ын гишүүд хүсэж байна.
Ц.БАТТУЯА
