Улс орны хөгжлийн нэг хөшүүрэг бол яах аргагүй ХЯНАЛТ, мөн ХАРИУЦЛАГЫН ТОГТОЛЦОО, түүнийг хэрэгжүүлэх механизм юм. Үүнийг тогтоогоогүй цагт хоосон шүүмжлэлээс ангижрахгүй. Тиймээс жилээс жилд, сонгуулиас сонгуульд нэг л зүйл улиг болон хэвшжээ. Энэ бол эзэнгүй, хоосон шүүмжлэл. Бидний өмнө эрх барьж байсан УИХ, Засгийн газрын бодлогын алдаа, түүнээс улбаалах үр дагавар нь улс орны эдийн засгийг сэхэхгүй болтол нь доройтуулсан. Ингэж л хэлж ирлээ. Улс орныг доройтуулсан, эдийн засгийг чирэгдүүлсэн зэргийг, түүний мөн чанарыг нь олж тогтоох нь зөв.
Гэхдээ хариуцлага гэдэг зүйлийг умартаж болохгүй. Урд хөршид, гүүр нурж унасны хариуцлагыг уг гүүрийн зураг төслийг гаргасан архитектор болон, гүйцэтгэлийг зөвшөөрсөн эрх мэдэлтэнтэй тооцсон. Насаар нь хорих, цаазаар авах ял оноосон.
Тэгвэл улс орныг өр ширэнд бариулсан сангийн сайд, ерөнхий сайдтай бас хариуцлага тооцох ёстой бус уу. Харин улс орны эдийн засгийг хөгжүүлсэн, өөд нь татсан хүмүүст зохих урамшлыг нь ч олгох ёстой бус уу. Монгол улсын хувьд хамгийн олон гавьяат эдийн засагчидтай хэрнээ хамгийн богино хугацаанд уруудан доройтож буй улс орны эгнээнд шилжлээ. Тиймээс МАН хариуцлагын тогтолцоо гэдгийг бий болгоосой, өөрсдөөсөө эхлээсэй гэж хүсэх байна.
Багш Д.БАНДИ