Тэгэх байлаа, ингэх байлаа гэж ярьдаггүй юм гэнэ лээ гэж нөхөд минь нэг нэгнээрээ тоглох дуртай. Энэ үг санаанд орлоо. Үнэхээр ч тэгсэн бол гэж байдаггүй юм байна. Алдсан нь л бол алдсан гэдэг хатуу үнэн ажээ. Энэ үгийг О.Насанбурмаадаа хаяглая. Оноо 2:2, бүхэл оноо авснаараа ялахад 25-хан секунд дутуу, цаг 05:35 гэж зааж байхад, О.Насанбурмаа туршлага зааж чадсангүй. Тэр толгойг нь уургалаад хэвтэхийн оронд, өөрөө толгойгоо уургалуулж, тэндээсээ хөлөө авахуулж, улмаар гэдрэгээ харж цэвэр ялагдлаа. Туршлагатай бөх гэхэд, туршлага дутлаа. Хараа, сэрэмж, хариу мэх үгүйлэгдлээ. Дөрвөн жил дуслуулсан хөлс, урсгасан цаг, хөдөлмөр ийнхүү талаар нэг боллоо. Ялж байгаагаа ялалтаар дуусгаж сурах хэрэгтэй байна. Үнэхээр хүч дутаж, ур чадвар хүрэхгүй байгаа бол хамаа алга. Өөрийнхөө хөдөлмөрийг үрэн таран хийхийг харах нь дэндүү гунигтай.
Ц.БАТТУЯА
