.JPG)
Статистикийн төв газар гэж бий. Тэр ямар дүн гаргаж, хааш нь хэрхэн танилцуулж байгааг иргэд гадарлах болжээ. Харин бие даасан нэгэн тандалтыг хөндлөнгийн хараат бус этгээд хийснийг танилцуулъя.
Тэр тандалтын дүнгээс харвал : Монголын иргэдийн 40 хувь нь буюу, 100 хүний 40 нь нэн ядуучуудын эгнээнд шилжсэн байна. Энэ бол аймшигтай, түгшүүртэй тоо. Түүний дараа ядуу гэсэн бүлэглэлд нийгмийн 20 хувь буюу 100 хүний 20 нь багтаж байна. Нийгмийн гол цөм болсон дундаж давхарга дөнгөж 25 хувийг эзлэх болсон гунигтай тоо байна. Харин чинээлэг нь 10 хувь, баячуудын бүлэг 5-хан хувийг эзэлсэн байна.
Нэгэн сургуулийн төгсөлтийн 4 ангийнхныг хамруулсан судалгааны дүнд ийм статистик дүн гарчээ. Энэ бол монголын иргэд дэндүү ядуурч байна гэсэн тоон үзүүлэлт. Уул нь нийгэмд дундчуудын тоо 60 хувь байвал нийгэм эрүүл байдаг гэж эрдэмтэд үздэг бол манайд дөнгөж 25 хувь болжээ. Энэ бол монголын нийгэм эрүүл биш байна гэдгийн баталгаа болох нь. Гэхдээ энэ бол гулсаж мэдэх тоо гэсэн түгшүүр бий. Хаашаа гулсах нь ойлгомжтой. Ядуу бүлэг улам нэмэгдэх нь. Баячуудын тоо, ядуучуудын тоо тэнцүү байх нь зөв харьцаа гэдэг. Гэтэл энэ нь манайд 40 : 5. Дэндүү зөрүүтэй.
Ийм л эрүүл бус нийгэмд монголчууд амьдарч байна. Өөрөөр хэлбэл, монголчуудыг ингэж л амьдруулж байна. Хөгжлөөрөө, дэлхийд дээгүүр бичигдэх, хүн амаараа монголчуудтай ойрхон 5 сая хүн амтай Дани улс гэхэд л ядуу иргэдгүй улсаар тодорчээ. Тус улсын иргэдийн 75 хувь нь чинээлэг иргэд гэсэн бүлэгт багтдаг байна. Улс хөгжихийн үндэс нь баячууд ихтэй байхдаа биш, чинээлэг давхарга хүчирхэг байхад оршино гэдгийг Даничууд тодотгож байна. Манайд энэ чинээлэг давхарга нь дөнгөж 10 хувьтай байх. Тэгэхээрээ, хэнийгээ түшиж улс орноо хөгжүүлэх билээ? Монголын төр өнгөн дээрээ эдийн засаг, эдийн засаг гэж нэдэр дээрээ улс төр ярьсаар, хийсээр, ард иргэдээ, тэднийхээ амьдралыг хөсөр хаяжээ. Ийм удирдагчдад хэн ямар дүн тавих нь ойлгомжтой. Ухаантай удирдагчид улсынхаа ч, ард иргэдийнхээ л амьдралыг өөд нь татах юм. Ийм жишээг Сингапур, Өмнөд Солонгос, Япон, Хятад зэрэг улс орны жишээнээс харж болно.
Харин Монголд ийм удирдагч, тийм төр байна уу? гэж иргэд асууж байна. Хариулах эрх мэдэлтэн байна уу? Байна уу, цаана чинь, тэр ....
Ц.ЭНХБАТ
