Урд хөршийн Ханжоуд G-20-ийн ажил хэрэгч уулзалт ид өрнөж, дэлхий дахины асуудлыг ид хэлэлцэж байх үеэр, манай ерөнхийлөгч олимпийн хүрэл медалиа булаалгуулсан гэх Г.Нармандах, дэлхий дахинд хэвлэлийн од болсон дасгалжуулагч Ц.Цогтбаяр, Б.Баяраа нарыг хүлээн авч уулзлаа.
Авилгатай тэмцэх нь зөв гэж тэр тодотголоо. Тамирчныхаа төлөө эсэргүүцэн тэмцсэн дасгалжуулагчдын үйлдлийг зөв гэж сайшаан гарын бэлэг болгож бугуйн цаг бэлэглэлээ. МЧБХ-ныхон дээрх асуудлаас болоод 2 хуваагдсан байгаа бол, Монгол улсын ерөнхийлөгч тус холбооны нэг талыг нь буюу, дасгалжуулагч, тамирчдын талыг ийнхүү дэмжлээ.
Одоогоор Дэлхийн Нэгдсэн Бөхийн Холбооноос МЧБХ-ны шигшээ багийн тамирчдыг дэлхий болон олон улсын чанартай каленьдарчилсан тэмцээнд оролцуулахаас түдгэлзсэн шийдвэрээ ирүүлсэн байгаа. Холбооноос хоёр дасгалжуулагчийн эрхийг 2 жилээр түдгэлзүүлсэн шийдвэр гаргасан. Өөрсдөө уучлал гуйсан.
Харин одоо ДБХ-ны эцсийн шийдвэрийг хүлээж буй. Яг энэ мөчид улсын ерөнхийлөгч нь дасгалжуулагчдаа дэмжиж буйгаа албан ёсоор илэрхийллээ. Энэ үйлдэл, ДБХ-ны шийдвэрт хэрхэн нөлөөлөх бол? гэж спортын хүрээнийхэн сонирхож байна. Сайнаар уу, муугаар уу? Эсвэл энэ бүхэн манай ерөнхийлөгчид хамааралгүй гэж үү?
Ц.ХИШГЭЭ
