.gif)
Сонгууль болгонд С.Зоригийн хэргийг сөхдөг. Энэ жилийн сонгуулийн гол сенсааци нь бас л С.Зоригийн хэрэг байх нь гэдэг хүлээлт иргэдийн дунд үүссэн байсан. С.Зоригийн алуурчныг баривчилсан. Захиалагч нь Ш.Отгонбилэг ч гэдэг цуу яриаг санамсартай, санамсаргүй тарааж эхэлсэн. Отгонбилэгийн хүү, УИХ-ын гишүүн О.Содбилэг ч зүгээр суулгүй, няцаалтыг өгч байсан. Хамгийн гол нь Б.Булганыг гэрээс нь гэнэт баривчлан саатуулж, нийгмээс тусгаарласан. Нийгмээс төдийгүй, шоронгийн хоригдлуудаас ч түүнийг бүрэн тусгаарласан байсныг УИХ-ын гишүүн байхдаа Ц.Оюунгэрэл олж мэдэж, нийтэд дэлгэсэн. Гэсэн ч хүлээлт хэвээр үлдсэн. Ямар сюрпризийг хэрхэн барих бол гэж? Гэтэл юу ч болоогүй, ямар ч өрнөл хөгжил тэндээс гараагүй. Булганыг нэг талаас "хамгаалан" нөгөө талаас "тусгаарлан хорьсон" хэвээр хаврыг, зунтай өнгөрүүлсэн.
Хаваржин, зунжин, өндөр настай Булганы ээж л хөлөө хүрэх газраа хүртэл ганцаараа явж, хууль хяналтын байгууллага гэдэг чинь ямар их хүнд сурталтай, хаалга нь ч, хүн нь ч "цоож, түгжээ" ихтэй байгууллага вэ? гэдгийг хэр чинээгээрээ нийгэмд таниулсан. Өнөөдөр харин Булганыг суллажээ.
Хариуд нь Э.Бат-Үүлийг яллагчаар татсаныг та бид мэднэ. Э.Бат-Үүлээс цусны шинжилгээ авсан байна. Мөн Э.Бат-Үүлийн орхиж одсон малгайг орон дээрээс биш, орон доороос мөрдөн байцаагчид олсон байдаг сонин мэдээлэл бий. Ямар ч байсан улсын баатар хүн яллагдагчаар татагдсан анхны тохиолдол болж бүртгэгдлээ. Э.Бат-Үүлийн хувьд, МАН засгийн эрхэнд гарах тоолондоо намайг Б.Булганы хэрэгт холбогдуулж шалгадаг, энэ удаа ч гэсэн хүний эрхийг зөрчиж байна гэж мэдэгдээд авлаа. Ийнхүү Б.Булган чөлөөлөгдөж, Э.Бат-Үүл яллаглагчаар татагдав. Булганыг Зоригийн хэргийн асуудлаар хэвлэлд мэдээлэлд ярилцлага өгөхийг хориглосон гэж ойрын эх сурвалж мэдээллээ. Булган гэртээ харьж, өндөр настай эхийн нь сэтгэл дэвтжээ.
Ц.ХИШГЭЭ
