Гуравхан сая ард түмнээ амар тайван аж жаргалтай амьдруулж чадахгүй байгаа төрийн түшээд, түүн дотроо Хатан ухаанаар төрийн буруу бодлогыг зөөллөж явна гэж гарч ирсэн эмэгтэй гишүүд маань жилийн нэг өдрийг аз жаргалын өдөр болгох юм байх.
Өвөг дээдсээс өвлүүлэн үлдээсэн асар их байгалийн баялагтай ард түмэн нэг өдөр аз жаргалтай бусад өдөр нь бүсээ чангалаастай амьдрах ёстой юу ?
Аз жаргалын өдөр гэж айл өрх бүр нь халуун ам бүлээрээ эрүүл саруул байж, 76 гишүүн шиг хүссэн бүхнээ хангах дуусашгүй их хөрөнгөгүй ч, дутах гачигдах зүйлгүй, орон байртай ажил төрөлтэй байх л болоод байна. Энэ бүхнээр нь хангаж чадахгүй байж бас нэг өдрийг баярын өдөр болгох гэнэ. Баярлах өдөр мундсан биш.
Улс орон түвшин сайхан, хүн бүр нь ажилтай орлоготой байвал аз жаргалын өдрөө тэд өөрсдөө товлочихно.
Эмэгтэй гишүүдийн аз жаргалын өдөр гэж товлосон тэр өдөр нь хэдэн айл хоногийн хоолгүй, хэдэн хүүхдийн нүд нулимстай зогсохыг тэд мэдэхгүй л дээ хөөрхий... Хий хоосон Аз жаргалын өдөр хэнд ч хэрэггүй буй за.
Л.ГАНТУЯА