С.Зоригийн амийг хөнөөсөн хэрэг илрэхэд ойртжээ. Нийслэлийн прокурорын газрын хяналтын прокурор Б.Батжаргалын "Өдрийн сонинд" өгсөн ярилцлагаас ийм сэтгэгдэл төрлөө. Түүний хэлснээр, -Э.Бат-Үүлийг сэжигтэн, яллагдагчаар татах үндэслэл гарч ирсэн учраас татаж шалгасан. Хэрэгт Э.Бат-Үүлээс гадна хэд хэдэн хүнийг шалгаж байгаа. Олон нийтийн анхаарал татсан, Э.Бат-Үүл шиг олны танил хүн холбогдсон хэрэгт мөрдөн байцаалтын ажиллагаа явуулахад хөндлөнгөөс нөлөөлөх гэсэн, олон нийтийн мэдээллийн хэрэгслээр хуулийн байгууллага хууль зөрчсөн мэт сөрөг ойлголт төрүүлэх зорилготой үйлдэл гаргадаг. Түүнийгээ болих хэрэгтэй гэж хэлсэн байна. Энэ үгийг хэвлэлийн бага хурал хийж "бужигнуулсан" жүжигчин Д.Сосорбарам ба түүний нөхдөд хандаж хэлжээ гэж ойлгогдохоор байна.
Харин түүний хэлсэн, -С.Зоригийн амийг хөнөөсөн хэргийн холбогдогчдыг илрүүлсэн, мөрдөн байцаалт дуусах шатандаа явна гэдэг мэдэгдэл тод сонсогдлоо. 18 жилийн дараа хэрэг илрэх нь гэдэг итгэл төрөхүйц мэдэгдлийг прокурор Батжаргал ийнхүү хийлээ.
Булганыг хэрэгт холбогдолгүй гэдэг байдлаар цагдан хорих, таслан сэргийлэх арга хэмжээг өөрчилсөн зүйл байхгүй гэж бас тодотгосон нь сонин мэдээлэл байлаа. Тэгэхээр Булган хэргийн сэжүүрийг тайлсан бололтой. Тэр ядарсан, магадгүй залхсан, бас гомдсон байх ч нөхцөлтэй гэж ажиглагчид дүгнэж байна. Орон дороос олдсон гэх Э.Бат-Үүлийн малгай, урд орой нь Булган, Бат-Үүл хоёрын хувийн харьцаа зэрэг нь олон зүйлийг тодотгох үндэслэл гэж судлаачид дүгнэж байна.
Ц.ЭНХБАТ