“Эрдэнэс Монгол”-ын гүйцэтгэх захирлаар 2015 оны хоёрдугаар сараас ажилласан Б.Бямбасайхан үүрэгт ажлаа хүлээлгэн өглөө. “Эрдэнэс Монгол”-ын ТУЗ-ийн өчигдрийн хуралдаанаар тус компанийн гүйцэтгэх захирлаар Ц.Түмэнцогтыг томилжээ.
Ц.Түмэнцогт 1993 онд Москвагийн Эрчим хүчний их сургуульд эрчим хүчний инженер, 2001 онд АНУ-ын Индианагийн их сургуульд гадаад харилцааны чиглэлээр магистр хамгаалсан аж. Ц.Түмэнцогт нь 2011 оны тавдугаар сараас АНУ-ын томоохон компани “General Electric”-ийн Монгол дахь суурин төлөөлөгчөөр ажиллаж буй.
Тэрээр өмнө нь Түлш, эрчим хүчний сайдын зөвлөх, Эрчим хүчний зохицуулах хороо, Төрийн өмчийн хороо, Дэлхийн банкинд ажиллаж байсан туршлагатай нэгэн бөгөөд 2013-2015 онд Монголын гүйцэтгэх захирлуудын клуб (CEO Club)-ийн ерөнхийлөгчөөр ажиллаж байсан юм.
А.САЯН