Хоёр сарын өмнө Замын-Үүд сумын засаг даргын үүрэг гүйцэтгэгч болсон Б.Анхбаяр Замын-Үүд сумын засаг захиргааны байгууллагын үйл ажиллагаа, тэр бүү хэл хүн амын эрүүл мэндийн тусламж үйлчилгээг тасралтгүй хүргэсээр ирсэн Өрхийн эмнэлгүүдийн үйл ажиллагааг тасалдуулж эхэллээ.
Замын -Үүд сумын Засаг даргын үүрэг гүйцэтгэгч бөгөөд МАН-ын дэд дарга Б.Анхбаяр нь Замын-Үүд сумын ЗДТГ, болон ИТХ-ын ажилтан албан хаагчид мөн сумын тохижилт компаний ажилчид гээд нийт 100 гаруй хүний нэг сарын цалингийн төсөв болох 50 сая төгрөгөөр авто машин худалдан авах шийдвэр гаргасан байна. Ингэснээр 9 сарын 20 гэхэд цалингаа авах байсан ажилтан албан хаагчид цалингаа авч чадаагүй байна.
Бүхэл бүтэн сумын ЗДТГ, ИТХ-ын ажилтан албан хаагчид, болоод сумын тохижилт үйлчилгээний 100 гаруй ажилчдын сарын цалингаар нэг дарга нь машин авч унаж байна. 100 гаруй ажилтан албан хаагчдын цалин хөлсийг өгөөгүйгээс гадна нийт сум орон нутгийн 20 гаруй мянган хүн амын эрүүл мэндийн анхан шатны тусламж үйлчилгээг саадгүй авах эрхэд ноцтой халдаж байна.
Замын-Үүд сумын 1-р баг, 3-р баг, Борхан гэсэн гурван багийн иргэдэд 3-4 жил ямар ч асуудалгүй эрүүл мэндийн анхан шатны тусламж үйлчилгээ үзүүлсээр ирсэн хоёр өрхийн эмнэлэгт мэргэжлийн хяналтын газрын шалгалт оруулж үйл ажиллагааг зогсоосон байна. Энэ байдлаас болж өнөөдөр тус сумын иргэд ганцхан өрхийн эмнэлэгт оочер дараалал үүсгэн үзүүлж байна.
Замын-Үүд сумын засаг даргын үүрэг гүйцэтгэгч Б.Анхбаяр нь хууль бусаар томилогдсон нэгэн. Тэрээр засаг даргын орлогч болохын тулд ЗДТГ-д хадгалагдаж байсан тамга тэмдгийг сейф эвдэн авч байснаас гадна өрөөний хаалгаа эвдэн орж эзэн суусан нэгэн.
Анхнаасаа хууль зөрчин томилогдсон засаг даргын үүрэг гүйцэтгэгч өнөөдөр Замын-Үүд сумын ард иргэд, ажилтан албан хаагчдын эрхийг ноцтой зөрчсөн тогтоол шийдвэрүүдийг гаргасаар байна.
Э.ҮҮЛЭНЦЭЦЭГ