Сангийн яамнаас нийт хүүхдийн 60 хувьд бэлнээр олгох 20 мянган төгрөгийг өчигдөр шилжүүлж эхэлсэн. Гэхдээ хүүхдүүдийн дансанд гурван сарын 60 мянган төгрөг бус 20 мянган төгрөг л орж буй тухай иргэд мэдээллээд байгаа.
Тэгвэл энэ талаар Хүн амын хөгжил, нийгмийн хамгааллын яамны Халамжийн асуудал эрхэлсэн ахлах мэргэжилтэн Б.Алтантулга "Долоо, найм, есдүгээр сарын хүүхдийн мөнгийг олгож эхэлж байна. Энэ сарын 04-ний өдрийн байдлаар долдугаар сарын хүүхдийн мөнгөний санхүүжилт өчигдөр оройноос банкуудаар дамжин хүүхдийн дансанд орж байгаа. Энэ долоо хоногтоо багтан найм, есдүгээр сарын мөнгө орж дуусна.
Хүүхдийн мөнгийг 1-6 дугаар сард 0-18 нас хүртэлх бүх хүүхдүүдэд олгосон. Харин 7-12 дугаар сарын хувьд Өрхийн мэдээллийн нэгдсэн санд бүртгэлтэй хүүхдүүдийн 502 онооноос доогуур амжиргаатай өрхийн 660 орчим мянган хүүхэд бэлэн мөнгөөр авна" гэжээ.
А.САЯН
