УИХ-ын сонгуульд АН-ын ялагдсан гол шалтгааны нэг бол Эрдэнэтийн УБҮ-ийн 49%-ийг хэдхэн олигархи хувьдаа шилжүүлсэн үйлдэл. 2016 оны 6-р сарын 13-ны өдрийн Засгийн газрын нууц хуралдааны протокол захаасаа ил болж эхэллээ. Түүнийг гардан гүйцэтгэсэн 3 сайд нь тодорлоо.
Энэ бол Сангийн сайд Б.Болор, Аж үйлдвэрийн сайд Д.Эрдэнэбат, Гадаад хэргийн сайд Л.Пүрэвсүрэн. Гадаад хэрэг, аж үйлдвэр, сангийн яам бол гурвуулаа Монгол улсын стратегийн гэж нэрлэгддэг онцгой яам. Ийм онцгой яамыг удирдаж буй тэдгээр сайд нар улс орны эрх ашигт харшилсан шийдвэр гаргахад гар бие оролцжээ.
Түүнийг нь дэмжсэн хүн бол ерөнхий сайд Ч.Сайханбилэг. Хамгийн их, санаачлагатай оролцсон хүний нэгээр гадаад хэргийн сайд Л.Пүрэвсүрэн тодорч эхэллээ. "-Танайхаас санал болгосон Эрдэнэт УБҮ-ийн 49%-ийг Монголын Засгийн газар авахаасаа татгалзаж байна. "Монгол зэс" компанид энэ 49%-ийг шилжүүлэхийг дэмжиж байна" гэсэн ноотыг Монголын Засгийн газрын нэрийн өмнөөс Оросын Засгийн газарт тэр гарын үсгээ зуран явуулсан байна. Л.Пүрэвсүрэнгийн хувьд тодруулахад, Ц.Элбэгдорж ерөнхийлөгчийн гарын хүн. Түүний гадаад бодлогын зөвлөхөөр ажиллаж байгаад, Ц.Элбэгдоржийн дэмжлэгтэйгээр Гадаад Хэргийн сайд болж байсан. Өмнө нь тамхины наймаа эрхэлж, тэр нь илэрсэн учраас, Холбооны Герман Улс түүнийг хилээр нэвтрүүлэхгүй хүмүүсийн жагсаалтад оруулснаа зарласан. Гадаад хэргийн сайд хэрнээ, Герман улс руу нэвтрэх эрхгүй, ийм л сайдтай байлаа, бид. Тэр одоо эргээд, Ц.Элбэгдорж ерөнхийлөгчийн зөвлөхөөр ажиллаж буй. Эрдэнэт УБҮ-ийн хувьчлалын асуудлыг Засгийн газрын хуралдаанаар зүгээр л нэг оруулаад шийдчихдэг зүйл биш. Түүнийг хяналтандаа байлгадаг, эцсийн зөвшөөрөл олгодог нөлөө бүхий хүн бас байна. Тэгэхээр тэр хүн л эцсийн "добро"-г олгосон байх нь ойлгомжтой.
Ц.Нямдорж гишүүн, - Эрдэнэт УБҮ-ийн 49%-ийг зарах үйл ажиллагааг зохион байгуулсан хүн нь Ц.Элбэгдорж гэж УИХ-ын чуулганы танхимд зарлалаа. Гол зохион байгуулагчаар нь Монгол улсын ерөнхийлөгч Ц.Элбэгдоржийг нэрлэлээ. Энэ бүхэн үнэн аваас, "Ард иргэдээсээ асуудаг байя. Баялагтай холбоотой асуудлыг шийдвэрлэхдээ арга иргэдээсээ асууж байж шийддэг болно" гэж хэлж Монгол улсын төрийн тэргүүнээр сонгогдсон Ц.Элбэгдорж хэлсэн үгнээсээ няцаж, монголчуудад өргөсөн өөрийнхээ тангаргаа зөрчиж, улс эх орон, ард түмнийхээ эрх ашгийг хөсөрдүүлсэн байна.
Засгийн газрын хуралдааны протоколыг нээх нь сайн, гэхдээ энэ алдааг хэрхэн залруулах, улс орны эрх ашгийн эсрэг хуйвалдааны, авилгын шинж чанартай үйлдэл хийсэн эдгээр эрхмүүдэд ямар хариуцлага тооцох нь бас анхаарал татаж эхэллээ.
Ц.ЭНХБАТ