Өнөөдөр БСШУСГ-аас Оюутны сургалтын төлбөрийн зээл олгохоор Боловсролын зээлийн сангийн нээлтийг хийлээ. Ийнхүү монголд үйл ажиллагаа явуулж байгаа, магадлан итгэмжлэгдсэн их, дээд сургууль, коллежид сурч буй оюутнууд уг сангаас төлбөрийн зээл авч болох боломж бүрдлээ. Оюутнууд зээлийн төрлөөс шалтгаалаад, сургуулиа төгссөний дараах 3-5 жилийн хугацаанд эргэн төлөх юм.
Зээлийн төрөл нь :
1. Хүү бууруулах зээл (Цалин тэтгэврийн зээлийн дуусах хугацаа)
2. Богино хугацаатай зээл (1 жил)
3. Урт хугацаатай зээл (10 жил) байх бөгөөд, жилийн 5 хувийн хүүтэй юм.
Нээлтийн үеэр БСШУС-ын сайд Ж.Батсуурь “Оюутны хөгжлийн зээлийн үйлчилгээ бий болж байгаа нь оюутан сурагцагчийг сургалтын төлбөрийн дарамтгүйгээр, амжилттай суралцахад мөн өрхийн санхүүгийн зардлыг бууруулж, амжиргааг нь тэтгэхээс гадна дээд боловсролын чанарыг дээшлүүлэхэд ч хувь нэмрээ оруулж байгаа” гэлээ.
Энэхүү зээлийн эргэлтийн болон хуримтлалын хөрөнгийг үүсгэхэд 2020 он хүртэл улсын төсвөөс санхүүжилт хийх бөгөөд Боловсролын зээлийн сан 2020 оноос хойш улсын төсвөөс мөнгө авахгүйгээр, зээлийг тогтвортой зохион байгуулахаа онцолсон юм.
Зээлийн талаар АШУҮИС-ийн оюутан Н.Цогтсайхан “Энэ бол оюутнуудыг төрөөс дэмжиж буй бодит дэмжлэг. Манай сургууль л гэхэд 8 жил суралцаж төгсдөг болохоор төлбөрийн асуудал маш их байдаг. Төлбөрөө төрөөс бага хүүтэй зээлнэ гэдэг бол ар гэрийн санхүүгийн хувьд ч том дэмжлэг болж байгаа. Зээл олгохоор болсонд оюутнууд бид баяртай байна” гэсэн юм.
О.НАНСАЛМАА