Бага насны хүүхдүүд түлэгдэх явдал буурахгүй харин ч өсөх хандлагатай байна. Өнөөх л эцэг эхийн хайхрамжгүй үйлдлээс болж хоёрхон хоногийн дотор бага насны гурван хүүхэд түлэгджээ. Тэд бүгд ой хүрсэн хүүхдүүд байгаа нь харамсалтай. Тодруулбал тэдний 2 нь халуун хоол цайнд хүзүү, цээжин бие болон бөгсөн хэсгээрээ түлэгдсэн бол, гэрт нь гал гарсны улмаас 11 сартай хүү түлэгдэн ГССҮТ хүргэгдэн эмчлүүлж байна. Хэлж ярьж анхааруулсаар байтал энэ төрлийн хэрэг буурахгүй байна гэж албаныхан анхааруулан сануулсаар...
Нийслэлийн хэмжээнд он гарсаар гал түймрийн улмаас 7 хүүхэд түлэгдэж, 4 хүүхэд нас барсан байна. Нийслэлийн Онцгой байдлын газрын албан хаагчид гал түймрийн дуудлагад цаг алдалгүй шуурхай ажилласнаар нийт 27 хүүхдийг гал түймэрт өртөж, эрүүл мэнд, амь насаа алдахаас авран хамгаалсан байна.
Эцэг эх, томчуудын хайхрамжгүй байдлаас бага насны хүүхдүүд гал түймэрт өртөж түлэгдэж, гэмтэж, эрүүл мэнд амь насаа алдсан тохиолдол гарч байгаа тул нийт эцэг эхчүүд, томчуудыг гэр, орон байрныхаа галын аюулгүй байдлыг хангаж, ахуйн ослоос урьдчилан сэргийлж бага насны хүүхдэд тавих хараа хяналтыг сайжруулах, харгалзах хүнгүйгээр гэрт нь цоожилж үлдээхгүй байж, хүүхдэд тавих хараа хяналтаа дээшлүүлэхийг ЦЕГ, НОБГ-аас анхааруулж байна.
О.НАНСАЛМАА