1968 оны энэ өдөр буюу аравдугаар сарын 20-нд Монгол Улсын гавьяат тамирчин, Ардын багш Чимидбазарын Дамдиншарав “Мехико-1968” олимпоос чөлөөт бөхийн 52 кг жинд хүрэл медалийн болзол хангаж, Монгол Улсын медалийн салхийг анх хагалсан юм.
Тэртээ 1968 оны олимпоос хойш Монголын тамирчид хоёр алт, 10 мөнгө, 14 хүрэл медаль хүртээд байна. Сонирхуулахад: “Мехико-1968” олимпод Монгол Улсаас эх орноо төлөөлж 16 тамирчин өрсөлдсөнөөс чөлөөт бөхийн 52 кг жинд Ч.Дамдиншарав, 70 кг жинд Д.Сэрээтэр, 78 кг жинд Т.Артаг нар хүрэл, 87 кг жинд Ж.Мөнхбат мөнгөн медаль хүртэж, олимпийн тэнгэрт эх орныхоо төрийн далбааг мандуулсан юм. Өдгөө 72 настай Ч.Дамдиншарав гуай чөлөөт бөхийн “Арслан” клубт өсвөрийн тамирчдыг дасгалжуулж байна.
Б.БАТБААТАР
