Нүүр   /   НИЙТЛЭЛ

2016-10-26  

“Sunday” худалдааны төвөөс Сансрын эвтэй 4 амьтны хөшөө хүртэлх 2 орчим километр зам дагуу өнөөдөр өглөөний байдлаар 60 ширхэг ТҮЦ байхыг тооллоо. 

Тухайлбал Сансрын тунелийн автобусны буудлын ойролцоо ТҮЦ-ийг сарын 800 мянган төгрөгөөр түрээслэдэг иргэн Л “Зарын сониноос түрээслэгчийнх нь утсыг авч түрээслэсэн. Яг хэн гэдгийг нь ч мэдэхгүй. Гэрээ хийдэггүй. Өдөр болгон 30 мянган төгрөг дансруу нь шилжүүлдэг. Мөн Татварын албанд л мөнгө төлдөг” гэлээ.

Зарим худалдагч 1 сар л түрээслээд арай гэж түрээсийн мөнгөө эргүүлж олж байна. Одоо болино гэх. Тэгвэл дараагийн түрээслэгч ирэхэд түрээслүүлэгч зөвшөөрөлгүй газраас ийнхүү мөнгө олоод дунд нь иргэд хохирч байгаа юм.

Нэг дор эгнүүлж байрлуулсан 6-7 ТҮЦ байх нь энгийн үзэгдэл бөгөөд зарж байгаа бараа бүтээгдэхүүн нь ижил, үнийн дүн нь ч зөрүү багатай байгаа юм. Тэд бэлэн гоймон болон ус ундаа, тамхи, ширхгийн хоол, бохь зэргээр орлогынхоо ихэнх хувийг олдог аж. 

ТҮЦ-ийн худалдагч хийж байгаа хүмүүсийн 3-ны 2 нь эмэгтэй, түүнээс тал хувь нь тэтгэврийн насны хүн байлаа. Ихэнх нь өглөө 7.00 цагт мухлагаа нээж оройн 23.00 цаг хүртэл эсвэл цагдаа нар хөөх хүртэл суудаг байна.

Дүүргийн худалдаа үйлчилгээний хэлтсээс зөвшөөрөл авж байж энд худалдааны үйлчилгээ явуулах эрхтэй болдог. Гэтэл ийм эрх ярих ч бүү хэл хэн түрээслүүлж байгаа вэ гэдгээ ч мэдэхгүй, хэлж өгөхгүй байлаа.

10 гаран жил ТҮЦ ажиллуулсан иргэн О “БЗД-т л гэхэд АСЕМ-аас өмнө ТҮЦ-ний үйлчилгээ эрхлэх 11 зөвшөөрөл л олгосон. Гэтэл өнөөдөр хар даа, Улаанбаатар тэр чигээрээ ТҮЦ болчихож” гэлээ.

Нээрээ ч 1,8 км дотор 60 ширхэг ТҮЦ байна гэдэг олон асуудлыг илтгэж байна. Наанадаж л ажилгүй иргэд цаашилбал хэн үүнийг түрээслүүлээд байна?, ямар зөвшөөрлөөр?

Э.Бат-үүл Хотын дарга байхад энэ асуудлыг цэгцэлж, зөвшөөрөлгүй ТҮЦ-үүдийг албадан буулгаж байсан. Гэтэл АСЕМ-ын дараа борооны дараах мөөг шиг л олноороо харагдах болсон энэ мухлагуудад хэн хяналт тавьж хэн шалгах ёстой вэ?.

Энэ дүр зураг ганцхан энэ дүүрэг хавьцаа ч биш Улаанбаатар хотын захууд болон автобусны ихэнх буудлууд дээр ажиглагддаг. Тэгэхээр Улаанбаатарт өнөөдөр хэдэн ТҮЦ байна вэ? гэдэг асуулт яахын аргагүй сонирхол татна. Бид энэ талаар албаны хүнээс тодруулан үргэлжлүүлэн хүргэх болно.

 

 

О.НАНСАЛМАА

АНХААРУУЛГА : Уншигчдын бичсэн сэтгэгдэлд CONTROL.MN хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 77008912 утсаар хүлээн авна

ИРЭХ СОНГУУЛЬД ТА АЛЬ НАМД САНАЛАА ӨГӨХ ВЭ?

МАН

АН

ХҮН

БУСАД

Санал өгөх