Өнөөдөр Хан-Уул дүүргийн Прокурорын газар Хан-Уул дүүрэг дэх цагдаагийн 1-р хэлтсийн үйл ажиллагааг иргэдэд сурталчлах “Нээлттэй хаалга”-ны өдөрлөг боллоо.
Ерөнхийлөгчийн тогтоолоор жил бүрийн 10 сарын 4 дэх долоо хоногийн Пүрэв гарагт болдог энэхүү өдөрлөгт тус дүүргийн хууль хяналтын бүх байгууллага оролцож иргэдэд хууль зүйн туслалцаа өгч асуусан хариултад нь нээлттэй хариулж байсан юм.
Нээлтийн үеэр Хан-уул дүүрэг дэх Цагдаагийн 1-р хэлтсийн дарга, Цагдаагийн Хурандаа С.Хүрэлбаатар “Хүмүүс хуулийн мэдлэг муутайгаасаа болж хэрэг төвөгт маш их орооцолддог. Хуулийн мэдлэгийг ном уншаад ойлгоно гэж бараг л байхгүй, их хэцүү.
Тийм учраас мэргэжлийн хүмүүсээс зөвлөгөө авч, өдөрлөгт идэвхтэй оролцохыг уриалж байна” гэлээ. Мөн дүүргийн 75-р сургуулийн ахлан ангийн сурагчид идэвхитэй оролцож, мэргэжилтнүүдээс асуулт асууж мэдээлэл авч байлаа.
Ү.Содномцог Хан-Уул дүүргийн прокурор “Гол нь энэ албан байгууллагууд ямар үйл ажиллагаа хийдэг гэдгийг олон нийтэд таниулах үүднээс салбар зөвлөлийн төлөөлөгч нар өргөн бүрэлдэхүүнтэй оролцож байна” гэсэн юм.
О.НАНСАЛМАА