Батлан хамгаалах яам, ЗХЖШ-т харьяалагддаг Монгол цэргийн музейгээс өнгөрсөн долоо хоногийн баасан гарагт Ж.Лхагвасүрэн жанжны гар бууг хулгайлжээ.
Хэрэг гарах үед музейн үзмэр харагч нь ойр хавьд байгаагүй бөгөөд хяналтын камерын дүрс бичлэгийг цагдаагийнхан шалгахад дунд сургуулийн сурагч хүү авсан байх магадлалтай гэж хууль сахиулах байгууллагын эх сурвалжууд хэлж байна.
Уг музейд хадгалж буй галт зэвсгийг ашиглах боломжгүй болгосон байдаг ч тэр бууны цохилуурыг авсан эсэх нь тодорхойгүй байна. Мөн өмнө нь тус музейгээс XIII зууны үеийн олдвор болох үйсэн хоромсогтой, хусан сум алга болгосон, музейн сан хөмрөгт байдаг XIII зуун үеийн монгол цэргийн сэлмийг АНУ руу үзэсгэлэнд авч яваад самурай бариул хийж хятад хуйтай болгосон хэрэг, мөн Г.К.Жуковын 985 гр цэвэр мөнгийг алтаар шармалдаж хийсэн Цэргийн гавьяаны улаан тугийн одон алга болж, оронд нь дуураймлыг хийж тавьсан гээд олон хэрэг гарч байсан ч цагдаагийн байгууллага одоо болтол нэг ч хэргийг илрүүлээгүй байгаа юм.
О.НАНСАЛМАА
