Хан-Уул дүүргийн 3-р хорооны нутаг, Яармагийн гүүрэн дор өнгөрсөн мягмар гарагийн үдэш толгойдоо сумны шархтай нэг эр байсныг иргэд олж цагдаагийн байгууллагад мэдэгдсэнээр эмнэлгийн тусламж үзүүлж амийг нь аварчээ. Одоогоор түүний биеийн байдал тогтвортой байгаа талаар ГГСҮТ-ийн эмч нар хэлж байна. Тэдний хэлснээр сум чамархайгаар нь орж тархинд үлдсэнийг мэс засал хийж авсан гэнэ. Хэргийн газрын үзлэгээр тайрсан “ГҮЗ-8” буу, хонгионоос гадна дээрх эрийн болон өөр хэн нэгний гутлын мөр олдсон аж.
Эх сурвалжуудын нэг хэсэг нь Баянгол дүүрэгт оршин суудаг 41 настай Д гэх эр амиа хорлохыг завдсан гэсэн үндэслэлээр эрүүгийн хэрэг үүсгэн шалгаж байгаа гэв. Бие нь сайжрахаар өөрөөс нь тайлбар авах бөгөөд одоогоор ар гэрийнхнээс нь мэдүүлэг авч эхэлсэн байна.
А.ГАНТУЯА
