Ц.Нямдорж бурхан биш хойно алдах, хазгай хэлэх, гишгэх нь бий. Гэхдээ л түүнд авах чанар бий. Чуулганы үеэр байцаалт авлаа гэнэ үү, юу гэнэ үү, хамаа алга. Тэр л ганцаараа шахуу Эрдэнэтийн асуудлыг тодруулахыг оролдлоо. Хананы цаана, хүний нүднээс далдуур юу болоод, юу хийгээд байгааг мэдэх, ядаж тэмтрэх эрхтэй байх ёстой. Ялангуяа, Эрдэнэтийн асуудал, түүний 49% гэнэт хэн нэгэн залуугийн халаасанд шилжиж байх үед. Энэ бол Монгол хүн бүрийн хариуг нь мэдэхийг хүссэн асуулт. Энэ асуултыг тавьсны төлөө түүнийг гоочилж эхэлсэн. Эрдэнэтийн асуудал ярьж эхлэхэд, асуудлыг гуйвуулж, олны анхаарлыг өөрт чигт хандуулах сурсан аргаа сурамгай хэрэглэсэн.
Эхнийх нь, Ц.Нямдорж Монгол улсын ерөнхийлөгч болох гэж байна гэсэн цуу тарааж, олон нийтийг "чулуу хөөлгөсөн". Дараагийнх нь, Эрдэнэтийн ерөнхий захирлаар Г.Алтанг тавих нь, энэ бол түүний хүн гэж мессэжийг нисгэсэн. Түүний араас, тэр одоо намын дарга болохыг сонирхож биш, бүр санаархаж байна гэсэн санааг хэвлэлээр чулуудсан. Ингэж л асуудлыг дүйвүүлж, тэр хооронд санаснаа хийж, сарвайснаа авч байна, эрх мэдэлтнүүд.
Ц.ЭНХБАТ