Турк улсын Измир хотноо болсон энэ жилийн Өсвөр, залуучуудын Дэлхийн аварга шалгаруулах Даамын тэмцээнд амжилттай оролцсон манай улсын баг тамирчид өнөөдөр "Чингис хаан" нисэх буудалд газардлаа.
Манай улсаас энэ удаагийн ДАШТ-д нийт 27 тамирчин 8 насны ангиллын тэмцээнд оролцож, 100 буудалт даамын үндсэн төрөлд алт, мөнгө, хүрэл тус бүр 1, Блиц төрөлд 1 алт, 2 хүрэл, Турк даамын төрөлд 5 алт, 7 мөнгө, 1 хүрэл нийт 19 медаль хүртэж, багийн дүнгээрээ 2-т бичигдэж, эх орныхоо нэрийг дэлхийд цуурайтуулаад ирлээ.
Тэрээр 100 буудалт даамын үндсэн төрөлд 17 хүртэлх насны ангилалд Монгол улсын спортын мастер Мөнхбаатарын ШИЙРАВЖАМЦ 14 оноогоор тэргүүн байр эзэлж, “Өсвөр Үеийн Дэлхийн Аварга” цолыг хүртсэн байна.
МУСМастер М.ШИЙРАВЖАМЦ “Өөртөө маш их итгэлтэй байсан болохоор энэ жил сайн тоглоно гэж өөрийгөө мэдэрсэн. Манай багш Оросын тамирчинтай сайн тоглоорой гэж захисан юм. Хамгийн сүүлийн өрөг дээр 2-т явж байхдаа л найз охин, ээж аав, багш гээд л бүх хайртай хүмүүсээ бодоод л түрүүлсэн дээ”
Тэрээр Дэлхийн аваргад явахаасаа өмнө өдөрт 6 цагийн бэлтгэл хийдэг байсан гэлээ. Тус тэмцээнд нийт 30-аад орны 218 тамирчид ур чадвар, оюун ухаанаараа өрсөлдсөн юм.
Блиц төрөлд Алтан медаль хүртсэн Э.ХҮСЛЭН “Би энэ спортоор 3 дахь жилдээ хичээллэж байна. Дэлхийн аваргын бэлтгэлийг сар гаруй хийсэн. Ямар нэгэн клубт хамаарагддаггүй. Анх ээжээрээ заалгаж сурсан” гэв.
Тэрээр ангийн найзаа угтан авахаар ирсэн 1-р сургуулийн 12-д ангийн сурагчид Дэлхийн аварга Шийравжамц гэсэн бичигтэй, өөрийнх нь хөрөг зургийг зурсан самбар болон баглаа цэцэг барьж угтсан юм. Дорноговь аймгийн даамын дасгалжуулагч Ш.Өвгөн “Миний 5 шавь явснаас 3 нь аварга болж, 2-нь мөнгөн медаль авсанд би маш их баяртай байна. Би шавь нараа 4 жил бэлдсэн. Миний шавь нар өнгөрсөн жил Голландад болсон тэмцээнээс мөн дэлхийн аварга авсан. Энэ жил “шар” медаль авчраарай л гэж захисан. Миний захиасыг сайн биелүүлсэн шавь нартаа маш их талархаж байна” хэмээн хэлэхдээ нүдэндээ баярын нулимстай, хоолой нь чичирч байлаа.
Дашрамд дуулгахад Дэлхийн даамын холбооны 2017 оны тэмцээний хуваарь гарсан байгаа юм байна. Ирэх оны 7 дугаар сард "Mongolian Open" тэмцээн "Дэлхийн цом"-ын цувралын нэг шат болж зохиогдох юм байна.
Харин он гараад удахгүй болох (2.19-2.26) Каннын нээлттэй тэмцээний урилга тус тэмцээний зохион байгуулагчдаас манай улсын даамын холбоонд иржээ.
Үндсэн төрөлд :
Алтан медаль М.Шийрэвжамц /17 хүртэлх хөвгүүд/
Мөнгөн медаль Б.Сүхбат /11 хүртэлх хөвгүүд/
Хүрэл медаль Б.Баярманлай /11 хүртэлх хөвгүүд/
Блиц төрөлд :
Алтан медаль
Э.Хүслэн /11 хүртэлх охид/
Хүрэл медаль Н.Налжормаа /11 хүртэлх охид/
Хүрэл медаль Б.Баярмагнай /11 хүртэлх хөвгүүд/
Хүрэл медаль Б.Мишээл /14 хүртэлх охид/
Турк даам :
Алтан медаль
Н.Налжормаа /11 хүртэлх охид/
Б.Баярмагнай /11 хүртэлх хөвгүүд/
С.Мөнх-Оргил /14 хүртэлх хөвгүүд/
Б.Билгүүндарь /17 хүртэлх охид/
Б.Сүлдбаатар /17 хүртэлх хөвгүүд/
Мөнгөн медаль
Э.Хүслэн /11 хүртэлх охид/
Б.Анужин /14 хүртэлх охид/
Б.Түвшин /14 хүртэлх хөвгүүд/
Б.Отгон-Эрдэнэ /17 хүртэлх охид/
А.Түшигбаяр /17 хүртэлх хөвгүүд/
Б.Батцэцэг /19 хүртэлх охид/
Б.Баатарсүх /19 хүртэлх хөвгүүд/
Хүрэл медаль
Б.Баяржавхлан /14 хүртэлх хөвгүүд/
О.НАНСАЛМАА