АНУ-ын сонгууль бидэнд ямар хамаа байхав гэж ярьж, бичиж байгаа олон хүмүүс байна. Гэтэл Америкт байгаа олон зуун Монголчуудын хувьд хамгийн зүрх түгшээсэн асуудал болж байгаа юм.
Учир нь Трампын мөрийн хөтөлбөрт иргэн бүр заавал Эрүүл мэндийн даатгалтай байх ёстой гэсэн хуульд өөрчлөлт хийх, мөн "харласан" хүмүүсээ хөөж гаргах, эцэг эх нь иргэн биш бол хүүхэд төрөхөд иргэн болохгүй гэсэн өөрчлөлтүүдийг хийхээр төлөвлөсөн байгаа.
Харин Хилларигийн мөрийн хөтөлбөрт татвар нэмэх, "Обамакэйр" буюу одоогийн ерөнхийлөгч Барак Обамагийн бүх бодлого, үйл хэргийг ерөнхийдөө үргэлжлүүлэх, "харласан" хүмүүсийг бичиг баримттай болгох, мөн цалингийн доод хэмжээг нэмэх гэсэн төлөвлөгөөтэй байгаа юм байна. Хэрэв Трамп ялбал манай “харласан” иргэд бүгд эх орон руугаа "ачигдана" гэсэн үг.
Трамп ялбал бидний хойд хөрш болох ОХУ-тай АНУ сайн хөршийн харилцаагаа сэргээж, цаашлаад рублийн ханш өсөх магадлалтай. Тэгэхээр дайны гал унтарна аа гэсэн үг. Хэрэв Хиллари ялбал уг хоёр улсын харилцаа тогтворгүй хэвээр байх бөгөөд дайн болох нөхцөл ч бүрдээд байгаа билээ.
Трамп Ерөнхийлөгчийн сонгуульд тэргүүлж байна гэсэн мэдээллээр Японы Токио хотод ам.долларын ханш унажээ. Мөн Трамп ялах магадлалтай болонгуут Канадын цагаачлалын веб хуудас ачааллаа дийлэхээ больсон байна. Энэ мэтчилэн улс орнуудын гадаад харилцаанд аль хэдийн өөрчлөлт ороод эхэлжээ.
Ц.ХИШГЭЭ
