Хүмүүнлэгийн Ухааны Их Сургуулийн Сэтгүүл зүй, медиатехнологийн тэнхимээс жил бүр “Алтан үзэг” сэтгүүлзүйн бүтээлийн наадмыг зохион байгуулдаг.
Уг наадмын зорилго нь “Их, дээд сургуульд сэтгүүл зүйн чиглэлээр суралцдаг оюутнуудын дунд ирээдүйн чадварлаг сэтгүүлчдийг дэмжих, тэдний авьяас чадварыг нээн илрүүлж, онолын мэдлэгийг нь практик үйл ажиллагаатай холбох” юм.
“Алтан Үзэг” нийтлэл, нэвтрүүлгийн наадмыг 7 дахь жилдээ зохион байгуулах гэж байна. Уралдаанд сонины нийтлэл, телевизийн нэвтрүүлэг, радио нэвтрүүлэг, нийгмийн реклам, баримтат гэрэл зураг зэрэг төрлүүдээр бүтээлээ ирүүлэх аж. “Уралдаанд ирүүлсэн бүтээлүүдийг агуулга, хийц, ур чадварын талаас сэтгүүл зүйн судлаачид болон туршлагатай сэтгүүлчдээс бүрдсэн баг шүүнэ” хэмээн Хүмүүнлэгийн ухааны их сургуулийн сэтгүүлзүй, медиатехнологийн тэнхимийн багш нар хэлж байлаа.
Өнгөрсөн жилийн “Алтан үзэг”-т ХИС, МУБИС, МУИС, РТДС, Идэр дээд сургууль зэрэг найман их дээд сургуулийн оюутнууд телевиз, радио, нийгмийн сурталчилгаа, нийтлэлийн төрлөөр 100 гаруй бүтээл ирүүлэн өрсөлдөж байжээ.
Х.ТЭМҮҮЖИННАМСРАЙ