Memoriad-2016 World Mental Olympics буюу оюуны олимпийн эхний төрөл болох "Хурдны хөзөр" төрлийн дүн гарлаа.
Тус төрөлд 27 улсын 167 тамирчнаас эхний 12 байрын 8-ыг нь манай тамирчид эзэлсэн бөгөөд хүрэл медалийн болзлыг ОУ-ын Мастер Т.Энхжин хангалаа. “Т.Энхжин нэг багц буюу 52 ширхэг хөзрийг 27 секундэд дарааллаар нь тогтоон алдаагүй нэрлэлээ. Мөн тус төрөлд 12 хүртэлх насны хүүхдийн эхний 3 байрт мөн манай тамирчид орлоо” хэмээн Монголын Оюун Ухааны Академийн багш, дасгалжуулагч Х.Хатанбаатар хэллээ.
Одоо цээж бодолтын төрөл болох "Mental Multiplication" буюу 8 оронтой 2 тооны үржвэр нийт 10 бодлогыг богино хугацаанд цээжээр алдаагүй бодох төрөл эхэлж байгаа юм. Энэ төрлийн оноо дүн маргааш гарна.
Дашрамд дурдахад ОУ-ын мастер Т.Энхжин 2015 оны Тайваны нээлттэй тэмцээний аварга болсон. Мөн Монголын Оюун Ухааны Академийн тамирчид өнөөг хүртэл олон улсын 39 тэмцээнд оролцож 524 медаль хүртэн Дэлхийн олон дээд амжилтыг шинэчлэн тогтоосоор байгаа билээ. Тамирчдадаа амжилт хүсье
Х.ТЭМҮҮЖИННАМСРАЙ