АНУ-ын Лас Вегас хотноо 4 жилд нэг удаа зохиогддог "Memoriad-2016" World Mental Olympics буюу оюуны олимп 2 дахь өдрөө үргэлжилж байна.
“Их мастер С.Цогбадрах "Flash Numbers" буюу харааны ой тогтоолтын төрөлд олимпийн дээд амжилтыг шинэчилж алтан медаль хүртлээ. Мөн энэ төрөлд ОУ-ын Их мастер Э.Пүрэвжав хүрэл медалийн болзол хангаад байна” хэмээн Оюун ухааны академийн багш, дасгалжуулагч Х.Хатанбаатар хэллээ. Энэ төрөлд 2012 онд манай тамирчин Их Мастер С.Цогбадрах 300 цифр тогтоон алдаагүй санаж алтан медаль хүртэн олимпийн дээд амжилтыг эзэмшиж байсан.
Харин өнөөдөр 486 цифр болгон дээд өөрийн амжилтаа шинэчлэн алтан медаль хүртсэн байна. Ингээд Их Мастер С.Цогбадрах оюуны олимпийн хос алтан медальтай Монголын анхны тамирчин болж байна.
ОУ-ын Их Мастер Э.Пүрэвжав 232 цифр алдаагүй санаснаар хүрэл медалийн болзол хангаад байна. Энэхүү олимпд 27 орны 167 тамирчин ой тогтоолт, цээж бодолт болон хурдан уншлагын 13 төрлөөр өрсөлдөж байна. Харааны ой тогтоолтын уг төрөл нь нилээд хатуу дүрэмтэйд тооцогддог аж. Секунд тутам дэлгэцэн дээр анивчих нийт 500 цифрийг (500 секунд) дарааллаар нь тогтоон алдаагүй санах чадвараар шалгаруулдаг байна.
Өнөөдөр тэмцээний хоёр дахь өдөр бөгөөд "Flash Numbers" буюу харааны ой тогтоолтыг шалгасан эхний төрлийн дүнг хүргэе.
1-р байр :
Дэлхийн #34, С.Цогбадрах (Монгол) - 486 цифр
2-р байр :
Дэлхийн #15, Кристиан Шафер (Герман) - 408 цифр
3-р байр :
Дэлхийн #17, Э.Пүрэвжав (Монгол) - 232 цифр
Мөн энэ төрөлд дэлхийн шилдгүүдийг ардаа орхижээ. Тухайлбал :
4-р байр ОУ-ын Мастер Б.Ариунсанаа (14 нас)
7-р байр Азийн Мастер З.Цэцэгзул (16 нас)
8-р байр ОУ-ын Мастер Т.Энхжин (18 нас)
9-р байр Н.Намуундарь (12 нас)
10-р байр ОУ-ын Их Мастер Э.Энхмөнх (18 нас)
11-р байр Б.Хангал (11 нас) нар тус тус шалгарсан байна.
Оноо дүгнэх : Эргэн санахдаа нэг л алдвал алдсанаас хойш хичнээн зөв байсан ч оноонд тооцохгүй. Жишээ нь, 500 цифр тогтоосон хэдий ч буцаж бичихдээ 4-р цифрийг буруу бичих буюу алдсан тохиолдолд алдсанаас хойш зөв байсан ч 3 цифр алдаагүй санасан гэж дүгнэнэ.
Оюун ухааны академийн багш, дасгалжуулагч Х.Хатанбаатар өөрийн цахим хуудаснаа : “Хүн тооны машинууддаа баяр хүргэе! Хоёр дахь өдрийн байдлаар бид 2 алт, 4 мөнгө, 4 хүрэл медаль буюу нийт 10 медалийн болзол хангаад явж байна. Бидний 40 дэх олон улсын тэмцээний амжилтын буухиа үргэлжилсээр... Лас Вегас хот / АНУ 2016.11.09 13.00 цаг” гэжээ.
Х.ТЭМҮҮЖИННАМСРАЙ