АНУ-ын Лас Вегас хотноо 4 жилд нэг удаа зохиогддог "Memoriad-2016" World Mental Olympics 2 дахь өдөрөө үргэлжилж байна. "Binary digits" буюу "Хоёртын тоолол" төрлийн дүн гараад байна. Энэ төрөлд 4065 цифр алдаагүй санаснаар Германы тамирчин Дэлхийн #2, ОУ-ын Их Мастер Ёханнес Маллов 2012 онд олимпийн дээд амжилтыг тогтоож байжээ. Харин энэ удаа манай тамирчин Их Мастер Б.Шижир-Эрдэнэ (16 нас) 4770 цифр алдаагүй санаснаар дээд амжилтыг шинэчилж алтан медаль хүртлээ.
“Мөн энэ төрөлд Азийн Мастер З.Цэцэгзул (16 нас) 4545 цифр алдаагүй санаж дэлхийн шилдгүүд болох насанд хүрэгчдийг ардаа орхин мөнгөн медалийн эзэн боллоо.
10 төрөл 12 өдөрийн дараах байдлаар манай баг тамирчид 4 алт, 6 мөнгө, 5 хүрэл медаль буюу нийт 15 медалийн болзол хангаснаар Монголын шигшээ баг бусад улс орноо тэргүүлж байна” хэмээн Монголын багийн ахлах дасгалжуулагч Х.Хатанбаатар мэдэгдлээ.
Энэ төрөл нь 30 минутын хугацаанд нэг эгнээндээ 0 болон 1 бүрдсэн 30 цифр бүхий аль болох олон мөр цифр тогтоон нэг цагийн хугацаанд цээжилсэн бүх цифрийг алдаагүй санах даалгавартай аж. Эргэн санахдаа нэг эгнээндээ нэг л цифр алдахад тал оноо буюу 15 оноо, хоёр болон түүнээс дээш алдахад оноо өгөхгүй байдлаар дүгнэдэг байна.
Хоёртын тоолол төрөлийн дүнг хүргэе :
1-р байр : Дэлхийн #21, Б.Шижир-Эрдэнэ (Монгол) - 4770 цифр
2-р байр : Дэлхийн #18, З.Цэцэгзул (Монгол) - 4545 цифр
3-р байр : Дэлхийн #2, Ёханнес Маллов (Герман) - 4351 цифр
Мөн энэ төрөлд дэлхийн шилдгүүдийг ардаа орхиж чадсан ОУ-ын Мастер Б.Ариунсанаа (14 нас) 5-р байр, ОУ-ын Мастер Т.Энхжин (18 нас) 6-р байр, ОУ-ын Их Мастер Э.Энхмөнх (18 нас) 8-р байр эзэллээ.
Энэ удаагийн тэмцээнд 5 төрөлд бага насны шилдгүүдийг шалгаруулж байгаа бөгөөд эхний гурван байрт :
1-р байр : Н.Намуундарь (Монгол) - 2085 цифр /12 нас/
2-р байр : М.Тамир (Монгол) - 1500 цифр /12 нас/
3-р байр : Б.Бат-Эрдэнэ (Монгол) - 1311 цифр /12 нас/
Өнөөдрийн тэмцээндээ амжилттай оролцсон баг тамирчдадаа дахин баяр хүргэе!
Х. ТЭМҮҮЖИННАМСРАЙ
