Засгийн газрын Хэрэг эрхлэх газрын дарга, УИХ-ын гишүүн Ж.Мөнхбатаар ахлуулсан УИХ-аас томилогдсон ажлын хэсэг МҮОНРТ-ийн удирдлага болон, уран бүтээлчидтэй МҮОНРТ-ийн байранд хэсэгчилсэн, нэг бүрчилсэн уулзалт хийж буй тухай уран бүтээлчид мэдээлж байна.
Ажлын хэсэг, МҮОНРТ-д үүсээд байгаа нөхцөл байдалтай танилцах ажлаа өчигдрөөс эхэлсэн байна. Тус ажлын хэсэгт ММ агентлагт сэтгүүлчээр ажиллаж байсан М.Оюунчимэгийг оруулсан нь, энэ байгууллага, хүмүүс, үйл ажиллагааг нь бусад гишүүдээсээ илүү сайн мэднэ гэж үзжээ. МҮОНРТ-ийг өр ширэнд баригдуулсан, мөнгө төгрөг завшсан, Худалдаа хөгжлийн Банкинд шилжүүлэх далд алхам хийгдсэн эсэхийг нягталж, тодруулахаар ажиллаж байна гэж уран бүтээлчид мэдэгдэж байна.
Харин, МҮОНРТ-ийн хуулиар сонгогдсон, тус байгууллагыг удирдах дээд байгууллага болох Үндэсний зөвлөл хааччихав аа? гэдэг асуудал анхаарал татаж байна. Тус байгууллагын бүтэц, зохион байгуулалт, төсөв мөнгө, хөрөнгө, удирдлагыг нь томилдог эрх бүхий Үндэсний зөвлөл хааччихав, түүний хажуугаар УИХ-аас томилогдсон ажлын хэсэг Юу хийж байна вэ? гэх асуулт шил шилээ даган гарч байна. УИХ оролцоод эхлэнэ гэдэг бол, юуны өмнө Үндэсний зөвлөлийн эрхийг авах ажлыг эхлүүллээ гэж ойлгож болно. Гишүүдийг хольж, солино. Өөрийн гэсэн Үндэсний Зөвлөл бүрдсэн тохиолдолд, Оюундарь байтугай, хэнийг ч хуулиар хольж, солих боломжтой. Эрх баригч нам МҮОНРТ-ийг удахгүй өөрийн гартаа бүрэн оруулна. Уран бүтээлчдийн хувьд, ирж буй дарга нар нь урдахаасаа дордож буйд сэтгэл дундуур байдаг юм байна.
А. ГАНТУЯА
