Жил бүрийн сар шинийн босгон дээр “Намхайнямбуу сан”-аас “Малд нүдтэй хүүхэд”-ийг тодруулдаг уламжлалтай. Энэ жилийн “Малд нүдтэй хүүхэд”-ээр Өмнөговь аймгийн малчин хүү Б.Батбэх тодорлоо.
Монгол Улсын Хөдөлмөрийн баатар хоньчин Ц.Намхайнямбуу агсны үр хүүхдүүд энэхүү шалгаруулалтыг 2003 оноос эхлэн явуулж эхэлсэн бөгөөд 12 жилийн хугацаанд 21 хүүхдийг “Малд нүдтэй хүүхэд”-ээр тодруулсан байна.
Өмнөговь аймгийн Сэврэй сумын Бүйлсэн багийн малчин Бөхчулууны Батбэх энэ жил 15 настай.
Есдүгээр ангиасаа мал аж ахуй дээр гарсан хүү аавтайгаа хамт морь уяж, айраг түрүү авсан төдийгүй ирээдүйд малын эмч болохыг хүсдэг гэдгээ энэ үеэр ярьж байлаа.
Монголын малчдын түүхэнд Ардын Их хурлын депутатаар дөрвөн удаа, УИХ-ын гишүүнээр нэг удаа сонгогдон ажилласан цорын ганц малчин бол Завхан аймгийн Сонгино сумын харьяат Цэрэндашийн Намхайнямбуу агсан юм. Тэрээр 29 насандаа БНМАУ-ын Хөдөлмөрийн баатар болж, хоёр түмэн хонийг төлөөр нь өсгөж нэгдэл нийгэмдээ өгч байсан бөгөөд “Баатрын минь алтан соёмбо, хоттой хонин дотор минь байсан” хэмээн хэлсэн байдаг. Мөн түүнчлэн “Бэрхшээл хүнд ялагдах гэж ирдэг, бэрхшээлийн ялагч нь эзэн нь байдаг. “Хүн хөдөлмөрлөх тусам ажлын үр дүнг мэдэрдэг” гэдгийг ч хойч үедээ захиас болгон үлдээжээ.
БЭЛТГЭСЭН : Л. ГАНТУЯА
