Ойрын хэд хоног үргэлжлэн орсон цас нийслэл хотын замын хөдөлгөөнд нэлээд саад учруулсан хэдий ч өнөөдөр дулаахан байсан болохоор ихэнх газраар хайлж байна. Гэвч замын хажууд овоолсон цасыг цэвэрлэх ажил үргэлжилсэн хэвээр.
Цас цэвэрлэж байгаа ТҮК-ийн ажилчидтай уулзаж ярилцлаа.
Нийслэлийн ТҮК-ийн ажилчид сүүлийн 21 хоног хамгийн богинодоо өглөө 8.00 цагаас оройн 23.00 цаг хүртэл илүү цагаар тасралтгүй ажиллаж байгаа. Саяын орсон цаснаар 3 хоног, 24 цагаар ажилласан, энэ маягаараа хэд хоног ажиллахаа мэдэхгүй байна.
Өнөөдөр дулаахан болохоор зарим газрын цас хайлж байна. Гэхдээ замын цасыг өнөөдөртөө багтааж ачихгүй бол өнөөдөр хайлсан цас маргааш өглөө болоход мөстөнө. Үүнээс болж осол аваар гарах эрсдэлтэй. Тиймээс болж өгвөл өдөртөө ачиж дуусгахаар ажиллаж байна.
Замын цасыг хайлуулах гэж бодис цацдаг. Хэрэв энэ цасыг замын хажуугийн ногоон байгууламж руу хийчихвэл дараа жил ногоон байгууламж ургахгүй хортой. Цасыг Цагаан даваанд аваачиж асгаж байгаа.
7-н буудлын энэ зам дээр өнөөдөр 3 машин, 2 ачигч торактор, 50 гаруй ажилчид өглөөний 8.00 цагаас эхлээд ажилласан. 15.00 цаг гэхэд 1 километр газрын цасыг ачлаа. Өнөөдөр 7-н буудал хүртэл ачих ёстой. Амжихгүй бол шөнө ч хамаагүй ажиллах байх.
Б.БАТБААТАР