Эрдэнэт УБҮ-ийнхээ Оросын талын эзэмшиж байсан 49 хувийг 27 настай хүүгийн нэр дээр бүртгэлтэй "Монгол зэс" гэх нэр дуулдах төдий компани "залгих"-ийг сонсоод Монголчууд нийтээрээ хиртхийсэн. Энэ тухай амтай бүхэн нь ярьцгаасан боловч, аажимдаа "амаа хамхиж" хувь заяатайгаа эвлэрцгээлээ. Цогтой, хэний ч өмнө бууж өгөхгүй, нэгийгээ үзэж, нэхий дээлээ тайлалцана гэж цээжээ дэлдээд байсан "баатрууд" зэрэглээ мэт замхрав. Эрдэнэт УБҮ, юу ч болоогүй мэт шинэ ТУЗ томилоод, эхнийхээ хурлыг хийгээд "хөдөлчихлөө".
Монголын хууль, хүчний байгууллага, улс төрийн нам, сөрөг хүчнийхэн, шударга гэх хүмүүс, хэвлэл мэдээлэл хэн хэн нь дуугаа хураалаа. Тэмцэж буй нэгнийгээ дэмжих олон нийт ч гэж үгүй болжээ. Бид ингэж тэмцэж, ингэж амьдарч байна. Шударга үнэн гэдэг "холджээ". Амиа бодож, довоо шарлуулсан Монголчуудын амьдрал өөдлөхгүй байх нь ч аргагүй юм уудаа.
Тэгвэл, Солонгосын ерөнхийлөгч Пак Ген Хёг бусадтай бүлэглэн, Солонгосын томоохон компаниудыг дарамталж, ихээхэн хэмжээний мөнгийг хандив нэртэйгээр "дээрэмдсэний төлөө", хэлэх үг, тавих илтгэлээ хөндлөнгийн хүнээр хянуулж, засвар хийлгэж байсны төлөө ард иргэд нь бослоо. Сүүлийн 10 жилд үзэгдээгүй эсэргүүцлийг ард иргэд нь илэрхийллээ. Тэд ерөнхийлөгчтэйгээ тэмцлээ. Тэдний дэмжлэг бол ердөө л Солонгосын хэвлэл мэдээлэл, шударга прокурорын байгууллага, тэдний ажилтнууд л байлаа. Мөн сөрөг хүчнийхэн яаж ажилладгийг үлгэрлэлээ. Олон нийтийг хамруулж чадсан, нийтийн давалгаа үүсгэсэн тэмцлийн үр дүнгээ тэд үзлээ. Тэд ялалт байгууллаа.
Солонгосын ерөнхийлөгч Пак Ген Хэ ард түмнээсээ хоёр ч удаа уучлал гуйсан боловч, хилэн нь дүрэлзсэн ард иргэдийн тэмцлийн хүрээ улам тэлж байлаа. Шударга иргэдийн нэг сая хүнийг хамруулах эсэргүүцлийн жагсаал нь өргөн олныг хамарч, зарим хэсэгт нь цагдаа, жагсагчдын хооронд мөргөлдөөн гарахад хүрч байлаа. Ням гарагийн эсэргүүцлийн жагсаалаар 6 цагдаа, 29 босогчид гэмтэл авч, эмнэлэгт хүргэгдсэн тоо байна.
Солонгосын ерөнхийлөгч Пак ард түмнийхээ эсэргүүцлийг зогсоож дийлэхгүй нь гэдгээ мэдэрч, огцрох шийдвэрээ гаргалаа. Одоогоор прокурорын байгууллагаас, Пак ерөнхийлөгчийн нарийн бичгийн дарга 57 настай Ан Чонг Бумын хамт, хамтрагч 3 этгээдийг баривчлан саатуулсан байна. Солонгосын анхны эмэгтэй ерөнхийлөгч эмэгтэй Пак Ген Хэ-гийн улс төрийн үлгэр ийнхүү жаргаж байна.
Түүний аав Пак Жун Хый бол 1961-1979 оны хооронд Солонгос улсын удирдагчаар ажилласан. Солонгос улсыг хөгжлийн зөв замд гаргаж өгсөн улс төрийн зүтгэлтэн гэж үнэлэгддэг. Түүний амийг түүний албаны ойрын шадар туслах нь хороосон гэж түүхэнд тэмдэглэсэн байдаг. Ийнхүү аав, охин ерөнхийлөгчийн төгсгөл үхэл болон, шоронгоор төгсөх нь ээ.
Тоймч Ц.ЭНХБАТ