Монгол улсыг улс төрийн аль нэг нам удирддаг гэдэг ойлголт замхрах тал руугаа орлоо. Ард иргэд улс төрийн нам болох АН, МАН-д санал өгч байсан боловч, энэ нь ямар ч үр дүнгүй зүйл болохыг АН-ын дарга, ерөнхий сайд асан Н.Алтанхуяг илчиллээ. Түүний хэлснийг тунгаавал, НАМ бол ердөө л ард иргэд, сонгогчдыг хошгируулагч аж. АН, МАН, МАН+АН, АН+МАН, АН+МАН+МАХН гээд л сонгогчдын саналаар Монголын Засаг бүрдэж байсан. Гэхдээ аль ч нам ялсан, Монгол улсыг ялсан нам, түүний гишүүд бус, нам дамнасан улс төр, эдийн засгийн бүлэглэл мэдэх болсон байна. Тэдний савраас, хараа хяналтаас юу ч мултрахаа больжээ. УИХ-ын дарга, ерөнхий сайд нар бол ердөө л тоглоомын төр, засаг, түүний амьгүй эрэг шураг болжээ гэдгийг Н.Алтанхуяг илчилж эхэллээ.
Ж.Эрдэнэбат ерөнхий сайд ч гэсэн бас л нэг хүүхэлдэй гэж ойлгож болох нь. Түүний мэдэл, эрх хэмжээ угаасаа хумигдмал буюу, түүнийг нь бүрэн хязгаарласан. Монгол улсын хүчний хуваарилалтыг зөвхөн энэ л нам дамнасан бүлэглэл хийдэг гэнэ дээ. Энэ бүлэглэл эрх мэдэл, сүр хүчээрээ далайлган, бүхий л томилгооны ард суусныг захаас нь дурдаж байна. Тэд Монголын хамгийн үнэтэй цэнтэй бүхнийг өөрийн бүлгийн мэдэлд шилжүүлж, бизнес эрхлэгчдийн мөнгийг хураан, бизнесийг нь булаан, эздийг нь шүүх, цагдаагаар далайлган зайлуулах ажиллагаа идэвхжээ. Тэд, өөрсдөө сонгогдоогүй ч, УИХ-ын гишүүдийг барьцаалан, өөрийн хүүхэлдэй болгож, санасан хуулиа саадгүй батлуулж байна. Тэд өөрсдийгөө сөрсөн, үг хэлийг нь дагадаггүй, дуулгаваргүй хүмүүсийг залхаан цээрлүүлж, нэг нэгээр нь "авлах" шинэ технологийг амжилттай эзэмшсэн тухай ч захаасаа ил болж эхэллээ. Энэ бүхний цаад эзэн нь, Элбэгдорж гэдэг нэрийг Н.Алтанхуяг айлгүй дурдлаа. Ц.Элбэгдорж болон түүний багтай тэмцэнэ, тэмцлээсээ ухрахгүй, өөрийгөө золиослоно гэж Н.Алтанхуяг мэдэгдлээ. Түүний гэр бүлийг оролдсон, дүүг нь барьж хорьсон, хүргэнийг нь ялласан, зөвлөхийг нь хорьсон гээд, түүнийг атгах барьцаа чангаруулах ажиллагааг төрийн байгууллагын оролцоо дэмжлэг, хууль хүчний байгууллагаар дамжуулан хэрэгжүүлж буйд Алтанхуяг эгдүүцсэн. Түүний тэсвэр алдагдсан. Ах дүү нар, ойр тойрныхон нь түүнийг ойлгож, дэмжиж, -Ах аа, та л бууж өгч болохгүй шүү гэдэг сэтгэлийн үг түүний тэмцлийг эргэлт буцалтгүй болгосон байна. Тэр, АН-ын Засгийн газрыг унагасан хүн, АН-ыг засаглаж чаддаггүй, хэрэлддэг гэдгийн захиалагч нь Ц.Элбэгдорж гэж хэллээ.
Мөн Таван толгой, Оюутолгойн Дубайн гэрээ, Оюутолгойн хэтрэлтийн 2 тэрбум ам. доллар, Таван толгой .., сүүлд Эрдэнэтийн 49%-ийн ард ч энэ бүлэглэл байдаг гэдгийг хэллээ. Тэр бүлэглэлийн үгийг дагаагүй учир, түүнийг огцруулсан. Энэ ажлыг давхар дээл гэх хуулийн төсөл оруулж ирснээр эхлүүлсэн тухай Н.Алтанхуяг иш татлаа. Тэр Монгол улсад ердийн иргэд мөрөөрөө амьдрах аргагүй болсон. Тиймээс энэ нийгмийг өөрчлөх ёстой. Түүний төлөө явна. Үүнийг хэрэгжүүлэхийн тулд, АН-ын даргад өрсөлдөнө, мөн Монгол улсын ерөнхийлөгчийн сонгуульд нэр дэвшинэ гэж мэдэгдлээ. Алтанхуяг улс төр, эдийн засгийн бүлэглэлтэй тулалдах нь тодорхой боллоо.
Гэхдээ тэр юунд найдна вэ? Ард иргэд, намынх нь жирийн гишүүд түүнийг дэмжинэ гэж итгэв үү? Шударга шүүх байгаа гэж тооцов уу? Солонгост өрнөж буй адил, нийгмийг хамарсан давалгааг үүсгэж чадна гэж найдав уу? Хэвлэл мэдээлэл тулж түшинэ гэж санав уу? Ямар ч байсан тэр "их " гэж хэлэхэд багадах иргэний зориг гаргалаа. Нэгэнт дуэльд дуудсан, Ц.Элбэгдоржийг, тэр.
Цаашдын нүүдэл нь юу болохыг иргэд олон нийт харзнаж байна.
Нийтлэлч Ц.ЭНХБАТ
