Нүүр   /   НИЙТЛЭЛ

2016-11-26  

“Чингүнжав” сан болон “Гамма” гэрэл зургийн агентлаг хамтран энэ жил анх удаа мэргэжлийн гэрэл зурагчид болон гэрэл зураг сонирхогчдын дунд хамгийн өндөр шагналын сантай гэрэл зургийн уралдаан зарласан юм. Өчигдөр 13.00 цагт “Хүннү” их дэлгүүр дэх Гамма гэрэл зургийн үзэсгэлэнгийн танхимд уг уралдааны шилдэгт багтсан 100 гэрэл зургийг дэлгэж, шилдэг бүтээлийн эздийн шагналыг гардууллаа.

“Монгол, монголчууд миний дуранд” нэртэй энэхүү гэрэл зургийн уралдаанд 400 гаран гэрэл зурагчны 1800-гаад зураг ирснээс шилдэг 100 зургийг шалгаруулж, шилдгийн шилдгээр тодорсон 24 зурагчинд шагналыг гардуулсан юм.

 

Үзэсгэлэнгийн хүндэт зочноор хамтран ажилласан УИХ-ын гишүүн асан “Чингүнжав” сангийн тэргүүн С.Баяр болон тус сангийн удирдах зөвлөлийн гишүүн, УИХ-ын гишүүн Л.Мөнхбаатар нар хүрэлцэн ирсэн байлаа.

Тэрээр С.Баяр “Гэрэл зураг гэдэг бол маш том урлаг. Бид ирүүлсэн 1800 зургаас шилдэг 100 зургийг шилж сонгох маш урамтай бөгөөд бас хэцүү байсан. Үлдсэн 1700 зургийг бүгдийг муу зураг гэж хэлж болохгүй. Оруулмаар сайхан зураг маш их байсан” гэв. Тэрээр С.Баяр Их Британид суух элчин сайдаар томилогдсон учраас энэ зургуудыг Англи руу авч явна гэдгээ хэлж байлаа.

Миний монгол орон, Хөрөг, Агшин гэсэн 3 сэдвийн дор уралдаанаа зохион байгуулсан байна. Уртын дуу, морин хуур эгшиглүүлж нээлтээ хийсэн үзэсгэлэнг тэр чигээрээ Монгол үнэр ханхалсан сайхан үзэсгэлэн боллоо хэмээн ирсэн зочид магтан ярьж байлаа.

 

Ийнхүү дээрх гурван төрөл тус бүртээ 1, 2, 3-р байр болон тусгай байр 2-г шалгаруулсан байна. Харин шагналын хувьд тэргүүн байр тус бүрт 3 сая төгрөг, дэд байрт 2 сая, гутгаар байрт 1 сая төгрөг дагалдуулсан юм. Харин тусгай байр бүрт 500 мянган төгрөг гардууллаа.

Бид монголчууд буюу “Хөрөг” төрөлд тэргүүн байр эзэлсэн гэрэл зурагчин Б.Батгэрэл “Тэргүүн байр эзэлсэндээ баяртай байна. Би 9 жил зураг дарж байгаа, чөлөөт уран бүтээлч. Миний 2 зураг шилдэг 100-д багтсан байна. "Говийн охины араншин" нэртэй зураг маань хөрөг төрөлд тэргүүн байр эзэлсэн. Хөрөг зураг дахь охин Дундговь аймгийн Дэлгэрцогт сумын охин, 2012 онд дарж байсан. Гэрэл зураг миний хувьд хамгийн үнэтэй, сонирхолтой зүйл” гэв.

Нээлтийн үеэр гэрэл зураг авдаг, сонирхдог залуус голдуу цугларсан байлаа. Тэд хэн ямар зураг дарж, тэр нь шилдэгт тооцогдсоныг сонирхож, мөн өөрийн авсан зургуудыг мэргэжлийн зурагчинд үзүүлж шүүмж хэлүүлж байгаа бүтээлч зурагчид ч харагдав.

Гамма агентлагийн захирал С.Цацралт “Анх удаа маш өндөр шагналын сантай, Баянхонгороос авахуулаад Өмнөговь хүртэлх аймгуудын чадварлаг гэрэл зурагчдыг хамарсан том хэмжээний гэрэл зургийн уралдаан зохион байгууллаа.

Тэмцээнд орж буй залуусын тоо маш их байна. Шагнал авсан 24 хүний 50 хувь нь мэргэжлийн гэрэл зурагчин, 50 хувь нь сонирхогчид байсан нь гэрэл зураг сонирхож байгаа залуучуудын ур чадварыг өндөр түвшинд байгааг харуулсан сайшаалтай зүйл боллоо” гэсэн юм.

Тэрээр уг гэрэл зургийн уралдаан орон нутаг дахь гэрэл зурагчдыг хүртэл хамарч чадсанаараа онцлог бөгөөд  Өмнөговь аймгаас л гэхэд 2, Баянхонгороос 1 гэрэл зурагчин шагналт байр эзэлжээ.

Ингээд үзэсгэлэнд тавигдсан шилдэг 100-н  гэрэл зургаас сонирхуулъя. 

Үзэсгэлэн энэ сарын 25-наас 12 сарын 5 хүртэл “Хүннү” их дэлгүүрийн Гамма  галерейд байршина.

 

 

О.НАНСАЛМАА

АНХААРУУЛГА : Уншигчдын бичсэн сэтгэгдэлд CONTROL.MN хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 77008912 утсаар хүлээн авна

ИРЭХ СОНГУУЛЬД ТА АЛЬ НАМД САНАЛАА ӨГӨХ ВЭ?

МАН

АН

ХҮН

БУСАД

Санал өгөх